ALELUYA . Den Marco Capitulo 16 vers 15 Hesus ta bisa : Bay den Henter e mundo y predica e Evangelio na tur criatura. Versiculo 17 ta bisa y e señalnan aki ta compaña of sigui esunnan cu ta kere, den mi nomber nan lo saca demoño, nan lo papia den lenga nobo,nan lo co’i colebra cu man y si nan bebe veneno mortal, esey lo no haci nan daño, nan lo pone man riba hende malo y esakinan lo bira bon.
Kico ta pasando awendia nos ta kere den mita evangelio, of nos ta kere solamente den evangelisacion, y e otro parti di cual Señor ta manda ta keda warda, pasobra e ta exigi Fe y un prijs di santidad pa paga. Mateo 17:17 ta splica cla dicon e señalnan no ta sosode: E discipel nan a puntra dicon nan no por a saca e demoño y Hesus a bisa ta pa motibo di boso incredibilidad, esey bisa den otro palabra , cu si bo no tin Fe , nada no ta pasa, cu fe manera un simia di mosterd bo por move un sero, pero si bo no tin fe bo no ta agrada Dios. Pasobra Dios kier pa nos tin fe.
Mundo ta pasando den un tempo cu hopi ta perdiendo speransa, hopi fe ta debilita, y hasta tin creyente cu no ta kere locual cu Hesus a bisa, nan tin miedo di enfrenta cualkier situacion den nomber di Hesus. Hopi hende no ta papia di sanacion, hopi no ta papia di liberacion , tin hasta ta floho pa hiba e palabra, pero mirando tur locual cu ta sosode den nos comunidad, nos tin cu sa , cu e mandato di nos Hesus no ta wordo ehecuta, pa falta di Fe.
Señor a duna nos un mandato completo, y e a duna nos e autoridad pa uza su nomber, pa nos por mira cosnan sosode. Pedro a bay bishita e Santonan (creyentenan) na Lida y aya tabatin un homber malo cu yama Eneas y Pedro a grita y bisa Eneas Hesus Cristo ta sanea bo lanta y co’i bo cama , y e homber aki tabata paralitico, y e homber a bula lanta y co’i su cama y sigui su caminda.
Pedro y Juan tambe a haci oracion cu e homber cu tabata lam for di den barica di su mama, y nan a bis’e : Den nomber di Hesus di Nazareth lanta y cana, nan a dun’e un man y e homber a bula lanta y cana. Drenta tempel y cuminsa cana, bula y alaba Señor.
Awor wak nos situacion awendia, tur hende scondi den cas, tur hende cu miedo , comercio stanca, negoshi cera, malesa ta mata miles, hende cu hamber, hende cu ta tuma vacuna, hende cu ta rechasa vacuna, hende cu ta stroba otro di tuma vacuna noticia negativo riba tur media, terorismo pa spanta hende y causa hopi daño den comunidad rond mundo.
Bo ta mira cu prome cu vacuna existi , tur hende tabata puntra ki dia lo bini algo pa detene e malesa aki y awor cu tin vacuna , casi nada no ta bon. Ta parce manera cada ken mester prepara nan propio vacuna den nan mes cas. Pasobra contra tur tipo di medio pa para e virus aki tin un keho. E palabra di Dios no ta cambia , pa esun cu ta kere, Señor a bisa e señalnan aki lo sigui of lo acompaña esunnan cu ta kere , pero nos ta mira cu noticia negativo ta debilita FE di hende tur dia. 1 Pedro 2:24 ta bisa cu den Su Herida nan nos ta cura.
Como Mayor , tata, of mama, wela, welo, voogd, locual cu bo por ta , awe nos ta pidi bo pa aumenta bo Fe den Dios, , pasobra ora nos lesa 2 Cron 7:14 nos ta mira cu ora nos uni den oracion, humilia nos mes y bira for di nos mal caminda, Dios lo scucha y sanea nos tera. Ya nos a pasa mas di 80 hende cu a fayece caba , kico mas nos ta warda, pa uni como pueblo y kere den Dios pa sanacion,Nos lo t’ey cu bo Diabierna Santo 2-4-2021 for di 6 am – 3 pm na bo HIT94FM, pasobra e palabra di Dios ta fiel y berdadero, pa esunnan cu ta kere, y si bo ta kere uni cu nos pasobra pa Dios nada ta imposibel.
Den Oracion tin poder y Dios ta haci milager.
Sinceramente,
Pastoor Marcel Balootje.
