Stop di core tras di yerba shimaron y cuminsa cuida e maishi (Mateo 13:27 -30). Den e ultimo tempo lo tin hendenan cu ta haci bofon cu ta sigui tras di nan mes pasion perverso, esakinan ta esunnan cu ta causa division cu no tin e Spirito. (Hudas 1:18-19).
Bo mester haci oracion pa Dios mustra bo, cu ken bo ta anda, pasobra e enemigo kier haci tur locual ta posibel pa desvia hende for di e berdad y pone hende kere den e mentira.
Y pa e logra esey nos ta rondonan cu esunnan cu ta haci bofon, hende cu sa cu algo ta malo pero ta persisti pa sigui den mes un cos pasobra ganashi ta pa nan, pero perdida ta pa abo cu ta kere.
Como mayor bo tin un tarea bastante dificil pa evita cu bo yiu ta cay den man di esun cu ta haci bofon, pasobra esaki por trece division den bo cas, ora abo como mayor, tin Hesus Cristo como Rey y Señor.
Ora un hende no ta respeta, ni balora e palabra di Dios, y ta haci cherche di Dios su poder y autoridad e ta converti su mes den un hende cu ta haci bofon, cu por haci solamente daño en bes di trece crecemento.
Pero Dios ta siña nos pa persevera, pa pone nos mirada riba Dios y no riba hende, pa pone nos fe den Dios y no den hende, pasobra no ta locual hende ta bisa esey ta dirigi nos bida, pero tur locual tin para skirbi den e palabra di Dios esey ta nos fortaleza.
Nos Dios ta un Dios di perseverancia y animo, asina bo mira hende cu ta papia negativo, cu ta critica solamente y cu no tin ningun alternativa constructivo, ni tampoco ta respeta e palabra di Dios, bo tin cu realisa cu bo ta deal cu un hende cu ta haci bofon di otro.
Tur cos ta posibel pa esun cu ta kere, den e nomber di Cristo nos lo papia y nos lo cana y nos lo haci, pasobra e nomber di Hesus ta e nomber cu ta habri y cera porta.
Si cada biaha bo keda ripiti cu cos ta malo, of sigui descurasha hende, of bin cu promesa falso cual ta inspiracion di diabel, bo ta cana den caya di esunnan cu ta haci bofon, pasobra bo relacion cu Dios ta hopi debilita.
Nos yiunan mester compronde cu nan no por sigui instruccion di hende cu nan mes no sa e caminda cu nan ta bay, ni tampoco ta respeta e palabra di Dios.
Nos yiunan mester conoce e berdad y abo como mayor ta responsabel pa esey, aunke bo mira tempo ta malo y cos ta dificil, bo tin cu sigui persevera y confia Dios, pasobra ta solamente Dios por yuda bo sali pa dilanti, hende por priminti cielo y tera, pero Dios tin e ultimo palabra.
Ta tempo pa stop di core tras di yerba shimaron y cuminsa cuida e maishi, pasobra yerba shimaron ta destina pa kima, esey ta locual Hesus mes a bisa, persevera den cosnan di Dios cu ta hiba bo dilanti, kende ta pone luz riba bo caminda y stop di confia den hende cu ta haci bofon di Dios.
Dios ta spierta, pero hende no ta haci caso, cada persona, cu ta aleha bo for di e caminda di Dios y cu no ta respeta Dios ta un hende cu ta haci bofon di otro.
Como mayor siña bo yiu pa persevera den Cristo Hesus kende ta e unico caminda di berdad y bida.
