Aruba ta den jn situacion hopi dificil na e momentonan aki. Un situacion cu ningun hende ta custumbra cun’e. E ta un situacion cu cada un poco-poco mester adapta su mes na dje, pa nos Sali venci den dje. Importante den e situacion aki ta pa sigui brinda e servicio.
Den e tempo aki cu hopi oficina a dicidi di manda personal cas y pa traha na distancia, comunicacion a bira hopi importante. 24ora.com, como e website di pueblo a ricibi masha hopi yamada di ciudadanonan preocupa. Nan no por haya contacto cu instancianan manera por ehempel WEB, Elmar, Setar, etc. Pero un di e kehonan di mas grandi ta cu no ta hayando contacto cu oficina di dokter di cas.
Un ciudadano a yama a pidi pa haci un apelacion na dokternan pa por fabor contesta telefon. No solamente dokternan pero otro instancianan, pero mas importante ta dokternan pa motibo cu e oficinanan aki ta cera y niun hende por yega eynan. Pa haya nan remedi, mester haya receta y ta solamente e dokter por duna esaki.
Un señora a conta cu el a yama oficina di su dokter varios biaha pero sin resultado. Den su desesperacion el a hasta tuma contacto cu AZV pa mira si nan por yud’e y hasta e presidente di Asociacion di Dokternan di Cas (HAVA) el a yama. Na final el a logra haya e dokter cu ta reemplasa su dokter. Ora cu el pensa cu su tortura a caba, esey no tabata e caso. E dokter ta uno nobo y a skirbi un pildo cu no ta esun cu e ta tuma. Pa haya e dokter bek ta otro dolor di cabes.
E ciudadano a comenta cu pa un persona cu ta sufri di presion halto, e situacion aki ta empeora su condicion. “Pakico bisa bo yamada ta importante pa nos” si na final no ta haya contesta. Por lo menos duna un number na cual e pashent of ciudadano por haya contesta riba su preguntanan. Comunicacion cu dokter di cas ta hopi importante mientras cu negoshinan manera WEB, ELMAR y otronan, mester tin algo riba internet unda tin un miho comunicacion, pasobra ciudadanonan ta keda cu pregunta. Pero comunicacion telefonico ta keda importante. Un ciudadano grandi a bisa nos “ami no sa traha cu internet. E cos ey ta manera abracadabra pami. Simplemente mi kier pa un persona contesta e telefon of duna un number unda nos por haya contact cu dokter. Hendenan ta kere bira malo y mester di dokter.”
