Esunnan cu ta completamente vacuna contra COVID-19 por biaha den Merca sin problema, pero tin cu bisti tapaboca den avion, bus of trein. Esaki ta informacion cu Centers for Disease Control and Prevention (CDC) a trece padilanti.
No ta cla kico e impacto di e norma nobo aki lo ta. Ya caba hende ta biaha y ta tuma decision riba nan mes. E aerolinea American Airlines a informa dialuna ultimo cu e bookingnan a subi cu 90% di loke nan tabata prome cu e pandemia. E guia nobo aki ta nifica “cu welonan completamente vacuna por biaha pa bishita nan nietonan saludabel sin haci test di COVID-19 of bay den cuarentena.
Mientras cu nan sigui e otro recomendacionnan di prevencion,” director di CDC, dr. Rochelle Walensky, a bisa.
E cantidad di casonan di COVID-19 ta sigui aumenta. E averahe di porcentahe di ultimo shete dia ta riba 62.000 caso pa dia. Aunke esunnan cu a vacuna completo por biaha cu riesgo abou, Walensky a bisa: “CDC no ta recomenda pa biaha den e tempo aki cu e riesgo di cantidad di casonan.”
Tabata di spera cu Merca lo surpasa 100 miyon persona di a ricibi sikiera un dosis di vacuna awe. Mas di 56 miyon Mericano a vacuna completamente, segun CDC.
Un persona ta considera vacuna completo despues di dos siman di nan ultimo dosis di vacuna contra COVID-19. Esey ta duna e curpa suficiente tempo pa traha antibody contra e virus.
E ultimo guia aki ta ofrece un otro paso pa esunnan cu a haya ambos dosis di Pfizer BioNTech of Moderna of un dosis di e vacuna Johnson & Johnson. CDC a indica cu test di COVID-19 no ta necesario pa esunnan cu a vacuna completo prome of despues di biaha den Merca. Tambe no mester bay den cuarentena propio.
