Habitante di Diamandbergweg na San Nicolas a bati alarma pa un candela di yerba awe marduga pa 3:00 am. Desconocinan a cende un mondi na candela y causa molester na henter e bario, na un ora cu tur hende tabata drumi.
Mesora bomberonan a activa y a combati e candela, cu a laga hopi huma atras, cu de facto a sigui causa molester na bisiñanan. Nan no tabata contento debi cu no ta prome biaha esaki ta sosode.
Nan ta sinti cu esaki ta un peliger pa nan cas. Bisiñanan a pidi polis pa patruya mas den e bario pasobra ta un hende ta cendiendo candela pa loco, te dia algo serio sosode. Separa di e miedo, nan a keha na autoridad cu esunnan sin airco ta haya nan ta guli holo di huma henter marduga, pasobra despues cu paga e candela, ainda e huma ta keda pa un bon rato.
