Diadomingo awor 8 di September Parokia di Paradera ta di fiesta pa recorda cu 70 aña
pasa e misa di Paradera, Misa Santa Filomena a keda inaugura. E misa di Paradera ta un anhelo di e habitantenan di e bario di Paradera y bisindario. Ya na comienso di añanan di 1930 e habitantenan di e tempo ey tabata kier nan propio misa.
Señora Jacoba Erasmus-de Mey tabata bosero di esnan cu e anhelo aki. El a bay misa di Playa pa haci un peticion na msgr Verriet pa traha un misa den e bario di Paradera. Asina aki tambe e anhelo a keda manifesta. Msgr.Verriet na aña 1935 a cuminsa reuni cu e habitantenan di Paradera, pero debi cu no tabata tin suficiente fondo y tambe door di segundo guera mundial a stop cu e trabounan temporalmente.
Despues di guera a sigui cu e trabounan. Dia 8 di September 1948, tabata e dia di gran fiesta, msgr Zeppenfeldt a bendiciona e misa. E misa a keda consagra na Santa Filomena door di msgr Verriet kende a haci un promesa na e santo cu si e Islanan di Antiyas keda salba for di e di dos guera mundial, e prome misa cu wordo construi lo keda consagra na Santa Filomena.
Asina aki e misa di Paradera y Parokia di Paradera a haya su patrona. Pa prepara pa e gran fiesta aki lo tin un triduo durante e SS di Misa di diahuebs, diabierna y diasabra 5, 6 7 di september pa 7or di anochi na Misa Santa Filomena na Paradera. Ta spera cu parokianonan lo participa grandemente.
Pa conmemora e ocasion special di 8 di September di 1949, diadomingo awo pa 5or di atardi for di e parkeerplaats di Misa Santa Filomena lo sali cu un procesion pasando den cayanan den bisindario di misa. Orkesta Harmonica Aruba lo compaña e fielnan cu e canticanan durante e procesion. Ta recorda tur gruponan cu a haya inivitacion pa participa na e procesion y pueblo en particular pa ta den misa no mas tarda cu cuarto pa cinco di atardi. Pa di e manera aki pa prepara pa sali cu e procesion na tempo.
Pa 6or lo cuminsa cu e Santo Sacrificio di Misa Solem di gradicimento celebra pa msgr Gregorio Redoblado, Vicario General di nos Diocesis, concelebra pa Pastoor Canuto (Toti) Fuentebella, Pastoor di Parokia y demas sacerdotenan presente. E SS di Misa aki lo keda canta pa Koor Uni di Parokia di Paradera cu canticanan di misa na latin. E SS di Misa ta conta cu presencia di mandatario y invitadonan special. Ta pidi tur fiel pa ta tempran na misa.
Despues di Santo Sacrificio di Misa lo sigui un actividad social-cultural den Centro Caiquetio. Durante e actividad den Centro Caiquetio lo honra algun di e Cooperadornan di Parokia di Paradera cu pa añanan largo a presta nan servicio y cooperacion na beneficio di Iglesia por medio di Parokia Santa Filomena. Pa e ocasion aki a saca durante e ultimo simannan invitacion publico pa parokianonan di Paradera. Ta recorda tur esnan cu a registra y reserva, pa presenta nan carchi di entrada na porta. Pa e parokianonan cu no a logra registra ainda, tin algun carchi ainda obtenibel na porta.
Pastoor Canuto (Toty) Fuentebella hunto cu e Comision Organisado Hubileo 70 Aniversario di Parokia Santa Filomena ta invita un y tur pa participa na e SS di Triduo diahuebs, diabierna y diasabra; 5,6 y 7 di september pa 7or di anochi na Misa Santa Filomena. Tambe cordial invitacion pa participa na e Procesion Diadomingo awor 8 di September pa 5or di atardi sigui despues pa 6or di atardi pa e Celebracion di e SS di Misa solem concelebra di gradicimento.
