Segun sra Arends-Reyes pa hopi aña por a tuma nota cu e gran edificio di e ex-John F. Kennedy school tawata den e estado di decadencia. Porfin despues di un vision y un plan di Gabinete Mike Enan 2 pa eleva e area cu ta e prome bista despues cu yega Aruba, un proyecto grandi mas cu a materializa.
Banda di e fase 2 di Lineair Park e gran monumento di ex-John F. Kennedy school lo complementa e area como uno bunita y moderno. E restauracion y renobacion di e edificio lo mester carga basicamente tur e departamentonan di Enseñansa, di Departamento di Enseñansa, DPS, Inspecion, Bureau Leerplicht huntu cu otro departamentonan di Cultura of por ehempel Unesco y Parlamento Hubenil, esaki tawata e plan en todo caso inicial.
E edificio ta conta cu tres parti cu ta primordialmente pa oficina y tin partinan di archivo y naturalmente cantina pa e personal.
Banda di e restauracion y renobacion un otro meta tambe tawata pa reduci e costonan drasticamente di huur di edificionan priva pa cada departamento, awor cu un edificio centralisa primordialmente pa Enseñansa e servicio lo mester ta mas facil pa clientenan yega, mas eficiente y den un ambiente moderno.
E proyecto ta den su fase final y pronto Aruba henter lo tin un edificio restaura y renoba segun arkitectura original caminda cu banda di e aspecto cu lo reduci gasto di huur, tambe e aspecto estetico pa e vecindario y monumento mas rescata, e lo ta di un balor grandi pa Aruba den e aspecto social y historico. Awe Aruba por mira mas proyectonan cu ta vision di un Aruba moderno y servicial na beneficio di su comunidad sra Arends-Reyes.
