Na Corsou, Parlamento ta di luto p’e perdida di e ex-presidente y actual miembro di Parlamento di partido MFK, Americo Thodé. Naci dia 27 di juli, 1950, e tabatin 73 aña di edad y tabata un personahe hopi stima pa pueblo di Corsou. Ta dos siman pasa, dia 27 di november ultimo, cu e tabata den Curacao Medical Center den condicion critico.
El a hasta bay den coma, pero despues di a bin bij. Pa hopi tempo e tabatin problema cu su salud. El a ricibi hopi mensahe di apoyo pa su pronto recuperacion. Pero lamentablemente diahuebs, 14 di december, el a bin fayece.
Amerigo Thodé ta un politico di Corsou di Movimientu Futuro Corsou. E tabata presidente di parlamento entre november y december 2012 y un biaha mas entre 24 di maart 2017 y 11 di mei 2017.
Den e decada di 2000, Thodé tabata secretario di Partido Frende Liberacion di e Trahadonan 30 di Mei (FOL) y mas despues el a uni na fila di MFK. Den e prome reunion di parlamento di Corsou, cu a tuma luga dia 10 di october 2010, a scoge Thode como vicepresidente. Dia 2 di november 2012, a eligi Thodé como presidente di parlamento. Despues cu a forma un coalicion nobo di gobierno, no a inclui MFK, el a retira como presidente di parlamento dia 6 di december 2012.
Na januari 2016, a acusa Thodé pa filtra informacion confidencial di un reunion di e Colegio di Supervision Financiero. P’e eleccion di 2016, Thode a ocupa e di cinco luga riba e lista di MFK. Como cu MFK a haya cuater asiento, e no a logra drenta Parlamento. Tempo cu Gilmar Pisas a bira Prome Minister na maart 2017, Thode a bolbe Parlamento dia 24 di maart y un biaha mas a bira presidente. William Millerson a asumi e presidencia dia 11 di mei 2017.
Na famianan di Amerigo Thodé, Headlines Group, cas editorial di 24ora.com y TREMPAN, ta extende su palabra di profundo condolencia.
