Scuridad, maldad, malicia y inmoralidad ta reina tur caminda y ta buscando tur manera pa hende permanece den nan gara. E falta di conocemento di e palabra di Dios, orguyo y rebeldia, ta pone cu hopi hende ta pensa cu nan no por sali for di e pica cu nan ta den.
Ken por a imagina nan mes cu lo yega un tempo, caminda lo existi ley cu ta mara hende den pica y inmoralidad y cu hende di sano huicio lo apoya esey y rechasa completamente e boluntad perfecto di Dios?
Pero ni asina mes e diabel no por gana e ta bataya pasobra ta para skirbi:
1 Juan 1:9: Si nos confesa nos pica, Dios ta fiel y husto di pordona nos, nos picanan y libra nos di tur inhusticia.
Isaias 55:7: Laga e malbado bandona su caminda, y e hende inhusto su pensamentonan, y lage bolbe cerca Señor y E lo tin compasion cu ne y cerca Dios, pasobra E lo pordona abundantemente .
1 Juan 2:1-2: Mi yiunan chikito, mi ta skirbi boso e cosnan aki, pa boso no haci pica.Y si un hende haci pica, nos tin un Abogado cerca e Tata, Hesus Cristo e husto. E mes ta esun cu ta tuma nos picanan riba dj’E y no pa di nos so, ma tambe pa esunnan di henter mundo.
Romanonan 5:8: Ma Dios ta demostra Su mes amor pa nos den esaki, cu tempo nos tabata pecador ainda, Cristo a muri pa nos.
Mikeas 7:18-19: Ken ta un Dios manera Bo, Kende ta pordona tur inhusticia y ta pasa e acto di rebeldia di e restante di Su herencia voorbij.
E no ta keda rabia pa semper, pasobra e tin delicia den misericordia cu no ta cambia.
E lo tene compasion di nos atrobe, E lo trapa nos inhusticianan, si Abo lo tira tur nan picanan den e profundidad di lama.
Salmo 103:12: Mes leu cu pariba ta for di pabao, mes leu El a aleha nos transgrecionnan for di nos.
Proverbionan 28:13: Esun cu ta sconde su picanan lo no prospera, ma esun cu confesa y laga nan lo haya misericordia.
Na tur cu alcansa di lesa e shete versiculonan aki, ta keda hopi cla demostra cu no tin necesidad di keda biba den pica pasobra Cristo Hesus ta nos salida for di pica.
Dios Tata a manda Cristo Hesus aki na mundo pa ken cu kere den Cristo no bay perdi ma haya bida eterno.
Pakico keda cana den orguyo, arogancia, inmoralidad, scuridad y malicia, si e plan di salbacion t’ey pa nos tur, pa asina nos por tin bida eterna?
Wak bon con diabel kier gaña nos hubentud, pa coy bentaha den nan bida, cu tur clase di mentira y bobedad sushi, cu ta bay contra e palabra di Dios.
Pero tristo ta con hende cu mester educa mucha, ta presta nan mes pa perhudica y pone mucha trompica awe y den futuro y wak con leynan kier cambia pa condena hende den perdicion.
No a keda nos nada mas cu lanta oracion tur momento, pasobra e palabra di Dios ta siña nos cu caminda dos o tres bay di acuerdo tocante cualkier cos aki na tera, nos Tata cu ta na shelo lo hacie. Hesus a bisa caminda dos of tres ta reuni den Mi nomber ey Mi ta memey di nan.
Nos tur sa cu tin poder den oracion, pasobra ta Dios mes a manda nos haci oracion y cu Dios ta contesta oracion.
Sinceramente, Pastoor Marcel Balootje
