Tur atencion ta riba DPL y DIMAS den e dianan aki pa mira ki paso nan ta tuma, relaciona cu un trahado stranhero di manicure cu Guarda nos Costa a gara trahando ilegal den Luminous Nails & Salon situa riba Sasakiweg. Pero, nan no a tene cuenta cu e doño ta ruman di minister y awor ta eherciendo presion enorme te cu a logra cu DPL a saca un conseho positivo den dos dia di tempo! Awor, trahadonan ta wardando pa saca e di dos conseho pa nan sali den un accion, pa demostra tur hende cuanto “friends & family” tin den e sistema di stranheria y di labor.
Cuña di minister cu ilegal den servicio
Tur cos a cuminsa na luna di februari ultimo, ora cu Guarda nos Costa a haya tip cu tin ilegal trahando na Luminous Nails & Salon. Sin sa di ken e ta of laga, e trahadonan di Guarda nos Costa a yega eynan di sorpresa y a pidi pa tur hende identifica nan mes cu nan permiso di trabou y estadia. A tuma nota masha lihe cu mayoria si no ta tur tabata stranhero. E director di e compania a identifica su mes mesora como Angie Oduber-Arias, naci na Colombia. Pero, e ta casa di Glenson Oduber, cu ta ruman di Minister Dangui Oduber. E ultimo aki ta ambtenaar pues dificilmente por pone e compania riba su nomber, aunke e tin cinco aña sin traha na DTZ y ta na disposicion di e oficina di su ruman.
E solo echo cu e tin un ilegal den servicio ta mustra cu integridad no ta presente den e negoshi ey y cu door di haci esaki, indirectamente ta haci daño politicamente na su sua, cu probablemente no tin “ni arte ni parte” den e practica aki. Mester midi awo si DIMAS y Guarda nos Costa lo aplica e multa di 10.000 florin pa e doño di negoshi cu tin un ilegal den su servicio. Aki ta caminda lo midi unda Minister Glenbert Croes ta para den e lucha contra ilegalidad!
Hacido di huña ilegal
Den e salon a topa cu un trahado, cu a identifica su mes como Maryuri Sanchez-Ruiz, procedente for di Venezuela. A hay’e ta traha como hacido di huña. A resulta cu e tabatin basta tempo trahando, sin cu e por a demostra un permiso valido di estadia of di trabou. Ora a yega cu ne na Guarda nos Costa, el a bisa nan cu su papelnan ta aden caba y tin cu sali na cualkier ora. Ora di verifica no por a haya nada, pero a opta pa dun’e beneficio di duda. A tah’e pa e saca su papelnan mesora y cu hopi prioridad, sino ta deport’e di nos isla. A dun’e “meldplicht” y semanalmente e mester presenta na Guarda nos Costa pa sigura cu e ta na Aruba, etc.
No a regla nada
Cu tempo, Guarda nos Costa a dicidi di yama e stranhero ilegal aki aden pa verifica con a bay cu su asunto di permiso. Pasobra dia cu a gar’e, a bisa cu su papelnan ta aden y cu tramitado lo a haci fout y yen di excuus mas. Despues di dos luna, a yam’e aden pa verifica con ta bayendo cu e permiso. A resulta cu ainda no a emiti e peticion mes! Consecuentemente, a dicidi di deten’e mesora y pon’e pendiente deportacion. A constata cu mas bien a laga dos luna pasa pa gana tempo y no a tuma Guarda nos Costa na serio. Es mas, tabata arogante tambe y insinua cu Minister Glenbert Croes a keda di regl’e p’e y cu e lo sali mesora.
Hues a aproba su deportacion
Como cu na e departamentonan DIMAS, DPL y Guarda nos Costa nan tin e forma di proceder di “friends and family” den e proceso, a opta pa, asina cu Minister Rocco Tjon a firma e “bevel” pa deportacion, pa nan mes bay hues-comisario pa verifica e decision. E hues a pone su firma abou tambe, ordenando Guarda nos Costa pa deporta e señora aki riba e siguiente vuelo humanitario pa Venezuela. Cu esey, corte a limita e chens pa Minister Glenbert Croes “overrule” su colega di husticia atrobe.
Conseho positivo a sali den dos dia
Pa demostra con e sistema ta funciona, asina cu a detene e señora cu status ilegal na Aruba, a core entrega un peticion na DPL y den dos dia a saca un conseho positivo. Trahadonan den DPL ta cuestiona con por ta posibel, pasobra no a “toets” e mercado laboral, saca aviso den corant, duna chens pa trahadonan solicita, etc. Asina cu DPL, cu ayudo di un contractant yega na famia di Minister Glenbert Croes, a procesa e conseho positivo, a core bay DIMAS y entrega peticion pa e trahado por haya permiso.
Ningun hende kier firma
Mirando cu Landsrecherche ta masha pendiente di DIMAS ultimamente y tur hende sa bon kico ta pasando eyden, a haci cu ainda ningun “hefe” no kier pone nan firma bou di e permiso. Algun dia pasa, ora di entrega e peticion, ta casa di Glenson Oduber a presenta pa entrega y a puntra si e permiso por a keda cla e mesun dia. A splic’e cu e procedura tin un caminda pa cana y cu e no ta keda cla asina lihe. E señora a corda e trahadonan cu e ta cuña di Minister Dangui Oduber y cu e mes a papia cu Minister Glenbert Croes cu a sigur’e cu e permiso lo sali mesora. Por lo menos un di e trahadonan a conseh’e pa e bay na minister mes y laga e mes firm’e anto, pasobra e tin e poder pa hacie. Claro cu esey no a sosode ainda, pasobra mescos cu e trahadonan di DPL y DIMAS…tur otro tambe ta wardando ken ta firma pa legalisa un ilegal atrobe sin pasa e proceduranan normal.
Glenson Oduber a rabia
Ayera sinembargo e situacion a bira pio y e presion a subi mas ainda ora cu e propio Glenson Oduber a presenta na DIMAS y DPL pa verifica con leu e permiso di “su” trahado ta. Cu bos halto el a exigi pa DIMAS saca e permiso mesora pasobra el a papia cu Minister Glenbert Croes caba y a primintie di regl’e den un dia. E no ta compronde dicon DPL a procesa e conseho positivo den dos dia y na DIMAS ya tin simannan bayendo y nada ainda di e permiso pa por saca e ilegal for di Guarda nos Costa.
A tira e problema den scochi di Minister Rocco Tjon
Como cu na Ministerio di Labor, Integracion y Energia nan ta consciente cu husticia tin wowo riba nan practicanan y cu si nan mester bay contra e “bevel” firma pa Minister Rocco Tjon y confirma door di un hues-comisario, cu lo bin problema serio, a pone cu awor a bin cu un otro idea. Glenson Oduber a splica ayera na DIMAS cu Minister Glenbert Croes mes a conseh’e awor pa e bay na Minister Rocco Tjon di husticia y pidie pa e firma un dispensacion riba e ordo di deportacion cu e mes a firma. A splica Oduber cu si Tjon firma esey, cu e lo tin mas chens pa saca e persona cu ainda ta cera na Guarda nos Costa
Pura prome cu Kramers yega
Un di e preocupacionnan mas serio di famia Oduber di Luminous Nails & Salon, ta pa keda cla cu e permiso firma prome cu e director di Guarda nos Costa, Richard Kramers, yega for di su vakantie. Nan ta consciente cu Kramers lo no coopera cu ningun procedura cu ta contra ley. Tambe nan sa cu asina cu e ta bek na Aruba, lo presiona pa e vuelo humanitario por sali pa caba y deporta tur cu ta cera eyden ainda.
Tur wowo riba Minister di Husticia
Te ainda Minister Rocco Tjon a demostra algun biaha caba cu e ta para duro pa combati ilegalidad riba nos isla y no ta dobla asina sin mas pa su colega Glenbert Croes. Un biaha su colega a laga baha un ilegal for di avion y a core dun’e un permiso y su tras Tjon a saca un carta rabia pa Croes tah’e di e practica contra ley aki! Despues di esey Croes a medio siña su les y Tjon a hur’e cu e lo cambia su maneho y lo publica esaki pa tur hende sa cu asina un ilegal drenta Guarda nos Costa y e firma su deportacion, cu ningun hende por par’e mas. Lo mester warda pa deporta e ilegal y despues regla su permiso y e warda e tempo cu el a haya di deportacion pasa, pa e por regresa. Te ainda el a para duro riba su maneho, pues awor tur wowo di tur e departamentonan ta riba dje, pa mira ki decision e lo tuma den e caso aki.
