San Nicolas ta conoci pa ta un districto yena cu ambiente, mirando cu e ta e cuna di Carnaval. Y esey a keda demostra diasabra durante su luhoso parada Grandi. Nada menos cu 14 Grupo, sin conta aden e brassband y esnan cu a habri e parada a pasa den e cayanan di San Nicolas, cuminsando for di 10’or di mainta.
For di trempan a cera e camindanan pa por acomoda miles di mirones banda di caminda y sin lubida e mas di 4 mil participantenan parti den 14 diferente grupo.
Sin duda, San Nicolas a keda dorna cu luho, mirando e tema cu e gruponan a bin cun’e. Y manera custumber, nos cumindad a sa di respalda e carnavalistanan y a gosa un mundo di e ambiente cu e gruponan a trece riba e dia aki.
Un palabra di pabien ta bay na e organisadornan SMAC cu un tremendo parada y sin laga afo e gruponan mes cu a sa di carga e parada aki cu tur su participantenan.
Resumen policial di parada grandi di San Nicolas
Cuerpo Policial mes a conta cu un total di 215 personal riba pia cu a guia henter e parada pa e cana netjes.
Cuerpo Policial mes a conta cu un total di 215 personal riba pia cu a guia henter e parada pa e cana netjes, cuminsando for di 10’or di mainta, manera ya indica, y terminando pa 6’or y 17 di atardi. E cabes mes a yega rond di 3:42 di atardi
Ta trata aki di un parada di por lo menos 4550 reparti den 14 grupo.
Diferente departamento di Cuerpo Policial a traha hunto entre otro Polis Uniforma, ME, Motor Unit, K-9 , Mobiel Commando, Departamento di Recherche, Personal administrativo y nos Commando Kamer. Tambe personal di CEA.
E aña aki a conta cu 16 detencion.
Aña 2018 tabata tin 24 detencion. Sigur esaki a baha cu mita, demostrando asina cu nos publico ta comportando mas miho. Ta di spera cu pa otro aña e yega na un minimo.
