Parada Grandi di San Nicolas a sali pa 10’or di mainta

Awe, diasabra, 2 di Maart, ta e antesala pa e recta final pa loke ta Carnaval 65. San Nicolas ta cera e temporada awe cu su Parada Grandi, cu ta pasa den e cayanan di San Nicolas.

Despues di un Parada di Luz exitoso, awe ta toca turno pa e gruponan den su totalidad, dorna San Nicolas cu pluma y ambiente.

Pa exactamente 10’or di mainta, e Parada a ranca sali sali for di Joe Laveist Sportpark cu un total di 14 grupo y ta programa pa caba 8’or di anochi.

Cuerpo Policial, hunto cu SMAC ta habri e parada, sigui pa Northstar Steelband y Family & Friends Steelband, ambos cu 25 persona cada uno.

Despues ta sigui e Opening Banner di SMAC y un banner special di #CuidaBoOrea. Rey Momo lo sigui cu 5 persona, kende ta mirando su penultimo parada, compaña pa Reinanan hunto cu Prins y Panchonan, cu ta un total di 10 persona.

SETAR tambe tey, compaña pa su 15 carnavalistanan. Upgrade Music lo tey pa anima e grupo.

Prome grupo cu ta bin ta Empire Carnival Group cu su tema Neon Party. E ta consisti di 400 persona y ta compaña pa Musical Time y Buleria.

2. Dushi Carnival Group, ta bin cu nan tema Land of Dreams. Dushi ta consisti di 200 integrante y Madness ta compaña nan riba caminda treciendo ambiente musical.

3. Champagne Carnival Group, ta bin cu su Kingdom of Ice. Champagne ta consisti di 900 participante y Tsunami ta compañanan cu su tremendo musica.

4. Royal Carnival Group ta bin cu su Cabaret Royale. E ta consisti di 150 participante y NBO tey pa brindanan ambiente.

Quality Brassband tambe tey pa asina plama e ritmo di ASAMBEHO entre e publico.

5. Unity Carnival Group ta bin cu 100 participante y Hot Ones tey pa anima e publico.

6. Infinity Carnival Group, ta bin cu e tema Exotic Birds of the Caribbean. E grupo ta consisti di 350 participante y D’licious ta compaña cu su dushi musica.

7. TOB Carnival Group, e grupo di mas grandi di henter e parada du 1200 participante, ta bin cu e tema Game of Thrones. N’Fuzion ta compaña nan cu bon musica.

8. Los Laga Bay Carnival Group, un di e gruponan di mas ambiente di Carnaval, ta bin cu su tema Royalties of C65. E  tin 500 participante y Robert y su Solo Banda Show tey cla manera tur aña tocando su estilo unico.

9. OPC Carnival Group, manera un clabo tey cu su Mundo Briyante di OPC. E grupo ta consisti di 200 participante y sin duda OREO tey pa anima su grupo.

Massive Brassband International, lo pone ambiente mientras tanto riba caya despues di OPC.

10. Majestic Carnival Group ta sigui cu su Gods and Goddesses. E grupo ta consisti di 115 participante y BMW tey pa parti ambiente rond.

11. Pink 4 Life Carnival Group ta bin cu su Coins on Fire. 250 participante ta bay balia riba ritmo di nada menos cu Le Groove.

12. Soca Kingdom Carnival Group ta bin cu su Warriors of the Los Gem. E grupo ta consisti di 50 participante y un DJ tey pa anima e publico.

13. Steelband Korps Marinier no ta falta pa mustra tur hende cu Militarnan tambe por pone ambiente riba caya. E Steelbanda ta consisti di 12 integrante.

14. Chelo Loco ta bin como ultimo grupo cu su Baile Tipico di Peru. E grupo ta consisti di 25 persona y un DJ lo trece ambiente.

No perde e penultimo parada di Aruba su Carnaval 65. Asina ta, si bo ta cerca, prepara bo stoel y bo drink y si bo ta bin di p’ariba di brug, sali tempran, pa asina bo tin bo spot pa bo disfruta en grande di e Parada Grandi di San Nicolas.

Comments

comments