Cu hopi menos mucha compara cu aña 2023, Parada di Noord tambe a confronta un problema chikito. Sin embargo esaki no a kita nada di e ambiente cu a sinti semper den e parada aki.
E aña’ki a registra 315 mucha cu a participa activamente den e parada unda cu 237 a yuda di un forma of otro pa yega na un total di 552 persona den henter e parada, compara cu e mas di 500 participante chikito den parada di 2023.
E aña’ki, compara cu 2023, tabatin solamente un banda den e parada cu ta NBO. E resto di musica tabata Relay. Hustamente un pick-up cu a transporta un di e sistemanan di relay a confronta problema y a stanca e parada pa un bon rato.
E gruponan participante tabata: Centro di Bario Noord cu a participa cu e tema Mi Buki Ideal; Colegio Bon Bini; e di dos grupo tabata Calabas Carnival Group cu e tema Sneeuw Blanco; Fantasia den Naturalesa ta loke cu Colegio Bon Bini a participa cu ne. Yupi Yupi Speel School a participa cu 20 mucha.
Otro grupo participante tabata: Scol Primario Kudawecha: SPK ta educa; Fundacion Rosea Cultural; Buki Cultural; Scol di hunga Chikitin Bin Bin a bini cu e tema E kitrin di florin hunto Eva Conta Storia & Peek a boo; Pierewietje Dancers cu Buki di Celebracion; y Scol Preparatorio Washington; Dede Berde. E dos ultimo gruponan aki tabatin 60 of mas participante, pues esunnan mas grandi.
Den hente e parada tabatin 2 carosa y ocho Roadpiece.
A pesar cu ta papia di un parada chikito, tabatin hopi ambiente y hopi hende riba pia. A combersa cu representantenan di Cuerpo Policial Aruba (KPA), Ramon Arnhem (Altocomisario) y vocero Liliana Rasmijn, kendenan a expresa nan satisfacción pa con cos a move. “Nos ta disfruta ora cu nos wak e muchanan disfruta. Esaki ta e esencia,” Arnhem, canando dilanti di e parada a comenta.
Liliana Rasmijn a comenta cu no a haya ningún problema cu Parada di Noord. El a sali banda di 2:00 pm, manera programa. Un problema chikito so tabata e pick-up cargando un relay cu a daña.
Segun dato cu a suministra na KPA, tin 7 grupo participando y cu un total di 579 persona moviendo den e parada como participante of como boluntario.
KPA a guía e parada aki cu 70 funcionario policial, tanto esnan riba caya como esunnan paden.
E permiso ta core te 6:00 ppm. Nan experiencia cu Noord ta cu tur aña nan ta caba na ora, cu ningun problema.
Specialmente den parada manera esun di Noord ta importante pa protege oido di e participante. P’esey tabata presente e boluntarionan di Quota Club International. Un di e boluntarionan aki ta Farida Figaroa, kende a cana henter e ruta cu e caha di proteccion di horea. Nan a acudi cu diferente boluntario. Door cu e muchanan ta haya charla na scol, nan ta consciente riba e importancia pa protege oido “y nan mes ta acerca nos”. Figaroa ta contento con grandi e consciencia pa protege oido ta awendia na Aruba. Scolnan mes ta cumpra pa su alumnonan. “E mensahe ta yegando.”
E Parada di Noord aki ta uno cu ta completamente den man di Centro di Bario Noord, cu a bini cu e idea for di tempo di SAC, e anterior organisado di Aruba su carnaval. Awendia poco-poco ta cambiando di lider pa un generacion nobo tuma over. Y un di nan ta Lili-Ann Giel, líder di grupo di Centro di Bario Noord. Giel di su banda ta papia di en total 10 grupo y 560 hende total den e parada aki. E aña’ki tin un solamente banda, tres disco y diferente relay.
No por a falta Sra Carnaval Jamilyenne Tromp, di Infinity Group, cu a disfruta di e parada di su bario y unda un nieto di dje ta participando.
Francis Geerman lider di grupo Yupi Yupi a conta cu nan a logra participa cu 20 mucha. Despues cu Noord a saca Reina di carnaval, nan a dicidi di participa. Den seis dia a prepara nan participacion. “Si nos tabatin tempo, lo a haci algo mas,” Geerman a comenta.
