Den e buki di Isaias capitulo 7 vers 9 ta para scirbi: Si boso no ta para firme den Fe, boso no ta keda para mes. Of miho bisa si boso no kier kere siguramente boso lo no permanece.
Bijbel ta alerta nos hopi biaha cu sin fe ta imposibel agrada Dios, den e buki di Josue capitulo 1 vers 9 Señor ta bisa Josue : No ta Ami ta ordena bo? Sea fuerte y tene curashi, no tembla ni desmaya, pasobra Señor bo Dios lo ta cu bo unda cu bo bay.
Como mayor nos tin di lanta nos yuinan fuerte cu nan Fe den Dios, pasobra tentacion di mundo, y maldad ta aumenta y ta loer den tur skina.( 2 Timoteo 3: 1-9)
No ta tempo mas pa cana den idolatria y bruheria, kere den talisman of un hende cu tin 10 renchi un na cada dede y e ta pensando cu esey ta su proteccion, cual ta un gran mentira, pasobra ora malesa bati na bo porta, of necesidad, ningun di e cosnan ey no por yuda bo, ta solamente Dios por yuda bo. Ta tempo pa nos para fuerte den Fe den Dios Todopoderoso.
Juan 14 : 6 Hesus ta bisa ; Ami ta e caminda, y e berdad y e bida, ni un hende no ta bini cerca e Tata sino ta pa medio di Mi.
PA NOS PARA FIRME NOS MESTER SA , NA UNDA NOS TA PARA.
Mateo capitulo 7 vers 24-28 Hesus ta splica nos cu E ta e Baranca y tur hende cu traha nan cas riba e Baranca ta hende sabi, pero esnan cu tende y no traha nan cas riba e Baranca ta hende bobo.
Pesey nos mester tin Cristo Hesus como prioridad den nos cas, pa asina ora mal tempo bin, nos cas y nos famia lo no sufri daño.
Sin Hesus den nos bida nos no por para firme, no tin siguridad.
Nos mester resisti diabel y su mentira nan, si nos fe no ta fundamenta den Cristo Hesus, nos ta bira yoyo di diabel, cual e ta haci cu nos manera e kier, pasobra ora bo no tin Fe den Dios, bo no tin resistencia contra maldad.(Santiago 4:7)
Sea sobrio, sea alerta boso adversario, e diabel ta cana rond manera un leon cu ta gruña buscando ken e por devora.( 1 Pedro 5:8+9)
Cada hoben cu ta cana cu arma, ta bende droga, ta usa droga, den gang,, den ladronicia, mester di palabra di Dios, arepenti y oracion pa nan sali for di scuridad.
Ta dificil pa baila den dos opinion.Galationan capitulo 5 vers 1 ta bisa: Ta pa libertad Cristo a haci nos liber , pesey keda pa firme y no sea someti atrobe na un yugo di sclavitud.
1 Corintionan capitulo 16 vers 13 ta bisa: Sea alerta para firme den Fe, actua manera homber, sea fuerte.
Hebreonan 10 vers 23 ta bisa; laga nos tene firme na e confesion di nos speransa sin basila, pasobra Esun cu a primiti ta fiel.
Mateo 24 vers 13 ta bisa:Ma esun cu perservera te na fin esey lo ta salba. Ta nos Fe , ta yuda nos para firme, den Cristo Hesus.
Para firme den Señor lesando Su palabra, den obedencia, stimando nos prohimo, pordona otro mescos cu Señor a pordona nos y haci oracion, y asina nos ta matene un contacto firme cu Dios.
Den Cristo Hesus nos ta mas cu vencedor.
Sinceramente,
Pastor Marcel Balootje.
