E shopping mall ta kedando practicamente bashi, awor cu mensualmente negoshinan ta sea mudando of cerando. Tin rumor insistente entre empleadonan den e mall cu Penha, Victoria Secret y Mac tambe lo sali proximamente for di e mall ki. Awe tardi 5:00pm, Deurwaarder a yega y a cera The Islander y Panache riba ordo di un compania di afo cu nan debe hopi placa. Abogado mr. David Kock ta representa e compania y a cana e caminda legal via Corte, pero Suresh, e doño di e dos tiendanan no a logra cumpli.
Cu e decision di Hues awe pa permiti pa pone beslag riba e tiendanan y tur nan “inboedel” y tur placa cu nan tabatin awe, a pone cu mester a cera portanan y stop operacion. Esaki ta un ultimo recurso cu Huesnan no ta aproba mesora. A duna e compania aki varios oportunidad pa por a yega na un acuerdo pa cancela e debe aki pafo di Corte y ora esey no a yuda, Hues mes a intermedia y a acorda un plan di pago. Pero e compania estableci na Aruba y na Corsou no a cumpli y awe e doño di e compania na Merca a dicidi di “pull the plug”.
Den e proceso aki awor, mas o menos 12 trahado den ambos tienda ta keda riba caya y sin trabou. Awe nan a conta nos cu ta algun luna caba nan ta “struggle” pa cobra nan salario. E doño ta paga nan pocopoco, segun benta ta drenta. Un sistema no desea pa ningun trahado cu tin nan gastonan mensual na cas pa cumpli cune.
A puntra e doño si nan lo cobra e fin di luna aki y el a contesta negativo. A duna tur trahado un carta pa nan bay cune na Departamento di Labor mañan mainta pa busca nan derecho. El a splica e empleadonan cu e no ta den posicion pa paga ningun debe mas awor cu a pone beslag riba e companianan.
E trahadonan a bisa nos awe, despues cu Deurwaarder a cera e portanan y saca tur hende afo, cu nan lo acudi na Minister Glenbert Croes, encarga cu asuntonan di labor y asuntonan social, pa busca un ayudo. Nan no kier perde nan trabou ni nan entrada dor di mal maneho di un comerciante.
