Joran van der Sloot, kende tabata cera den e penal di Ancón I, tabata hiba awe mainta den un vehiculo policial p’e Grupo Aereo N.° 8 den Callao y tabata entrega n’e agentenan di e Oficina di Investigacion di Merca (FBI) despues di un resolucion 22° Juzgado Penal di Corte Superior di Husticia di Lima.
Via su cuenta di Twitter, Corte Superior di Husticia di Lima a indica diamars ultimo cu e determinacion aki “e hues a culmina e tramite di extradicion pasivo di Joran van der Sloot, kende lo ta procesa y husga na Merca p’e supuesto comision di delito di extorsion y estafa contra Elizabeth Ann Holloway.”
Rond di 7:10 am Joran van der Sloot tabata hinca den e avion cu lo hib’e pa Merca. E Hulandes ta regresa Peru unabes cu su caso hudicial termina, asina e hefe di Interpol Lima, coronel PNP Carlos Lopez Aedo, a indica. “Ta trata di un traslado temporal pa Merca unda e ta enfrenta un huicio, despues e ta regresa nos pais pa cumpli cu su condena cu ta conclui na 2035”, el a bisa, cita p’e agencia Andina.
Den un pronuncia cortico via su cuenta di Twitter, Ministerio Publico a señala di a supervisa e entrega temporal di e detenido n’e autoridadnan Mericano y a informa cu e Oficina di Cooperacion Hudicial Internacional y Extradicion di Fiscal di Nacion a exigi, den nomber di Estado Peruano, cu van der Sloot “sigui deteni bou condicion penitenciario similar cu e tabata conta den nos pais.”
E ciudadano Hulandes tabata condena na 28 aña di prizon na 2012 p’e homicidio di e Peruano Stephany Flores na 2010, kende el a conoce den un casino y posteriormente el a hib’e den su camber di hotel, unda el a strangul’e pa hort’e, pa cual el a dicidi di huy pa Chile, pais unda e tabata expulsa y debolbi pa Peru.
Van der Sloot a confesa e crimen aki pa purba reduci e pena solicita p’e Fiscal. Cinco luna despues, na maart 2012, husticia Peruano a anuncia cu van der Sloot lo ta extrai pa Merca despues di cumpli su condena na Peru.
Caso Holloway
N’e momento ey, el a declara procedente un solicitud pa ta husga p’e comision di extorsion y estafa contra e Mericano Elizabeth Ann Holloway, mama di Natalee Holloway, kende ta disparce.
Van der Sloot ta un di e principal sospechoso di e desaparicion di Natalee Holloway, kende tabata mira pa ultimo biaha hunto cu ne na 2005 durante su biahe di graduacion pa Aruba, isla unda e acusado tabata biba.
Na 2014, e Hulandes tabata interna den un penal pa preso peligroso pa menasa di morto e director di prizon unda e tabata n’e momento ey.
El a responde cu menasa momento cu nan a kita un telefon cu e tabatin, a pesar di ta prohibi den e prizon di Piedras Gordas, pafo di Lima, asina fuente di e Instituto Nacional Penitenciario a bisa.
P’e motibo ey e tabata hiba n’e prizon di Challapalca, na 4800 meter di haltura den e sierra sur di Peru, unda e temperatura por pasa di nuebe grado durante dia pa binti grado bou cero den anochi. E mesun aña ey, el a casa c’un ciudadano Peruano den prizon cu ken e tabata en espera di un baby.
