E retiro no a bin di sorpresa, debi cu e nomber tabata circula for di prome cu e coalicion a sinta caba, como un figura prominente pa persecucion politico.
Drs. Frank Hoevertsz awe a haya su di tres retiro for di un Gobierno di asignatura di partido MEP. E prome tabata na aña 1993 bou liderazgo di Nel Oduber y cu Charo Kelly como Minister. A kit’e for di e puesto di Director di FCCA pero Gobierno a cay y asina e coalicion nobo a tum’e bek na trabou. Pero 9 aña despues, asina cu MEP a bolbe na poder pero cu Marisol Lopez como Minister a kite atrobe desde 1 di januari 2002.
A hiba Gobierno dilanti Corte pero a scoge pa yega na un acuerdo cu ambos por a biba cune. Awor na 2019, atrobe bou un Gobierno di MEP pero e biaha aki cu Evelyn Wever-Croes na cabes ta bolbe kit’e, pa cual por spera un otro caso civil den Corte pronto, si acaso no yega na un otro “golden handshake” pa e profesional Arubiano aki, victima di persecucion politico. Su abogado ta mr. Hans Sjiem Fat mientras cu abogado mr. Anthony Ruiz a representa Gobierno como doño di Utilities Aruba NV den e reunion di accionista.
E decision ta pa kita Hoevertsz for di su puesto di Director pero no for di trabou. Awor lo cuminsa e proceso pa yega na un acuerdo mutuo, mescos cu a haci na NV Elmar of sini pidi Hues pa desolve e contract di trabou. E director tin casi 2 aña mas di trabou pendiente prome cu e baha cu pensioen
