“Nos como nurse ta prome yama pa ricibi e vacuna di COVID-19 pa garantisa cu nos por sigui duna e cuido sin afecta nos mesun salud, salud di nos famia y nos comunidad,” segun e Organisacion di Enfermeronan di Aruba (ODEA). Den un relatona prensa e organisacion ta indica cu e vacuna no lo caba cu e virus di COVID pero sigur a drenta e era di por combati e pandemia aki cu menos peso riba nos cuido medico.
“Nos como nurse manera nos a drenta nos opleiding como studiante nos a ricibi nos prome vacuna cu nos profecion ta exigi pa nos tuma, cu ta Hepatitis-B. Nos nunca por a pensa cu nos lo experencia un pandemia cu awo nos ta para dilanti e decision pa tuma vacuna contra COVID-19. Manera nos por a wak tur trahando den cuido no ta duda pa tuma esaki,” e relato di prensa ta sigui bisa.
Tuma e vacuna
ODEA ta stimula pa tur persona cu ta traha directo of indirecto den cuido pa tuma e vacuna aki pa na prome luga proteha bo mes. Aruba awo mas cu nunca tin mester di cada un profesional pa por sigui den e lucha contra e virus aki, cu a bin pa keda y a afecta mundo henter. ODEA Ta pidi comunidad pa banda di tuma e vacuna aki pa sigui cuida y mantene na e protocolnan di COVID, na tur momento.
Ta pidi tur hende pa registra pa asina yuda coleganan di DVG cu ta registra y planea e accion di vacuna aki por cana na un manera eficiente pa garantisa cu mayoría poblacion di Aruba por ricibi esaki den e tempo stipula. ODEA ta felicita tur colega y tur cu ta traha den cuido pa ta e ehempel pa tur cu ainda ta den duda. “Nos ta desea tur profesional cu ta traha den cuido hopi forsa pa hunto nos sigui dilanti den e pandemia aki,” ODEA ta indica den e comunicado di prensa
