Recientemente cabesantenan di algun Centro di Cuido di Mucha a finalisa e curso di “Maneho Pedagogico. E curso ta organisa specificamente pa doño/ cabesante pa asina enfoca riba e aspecto di e Maneho y Plan di trabao Pedagogico den nan Centro.
A duna e cursonan aki riba diasabra, 13 y 20 di februari sigui pa un examen cu a tuma luga riba dia 2 di maart. Un bon maneho ta esencial pa tur trahado pa asina por traha a base di e vision y metanan pa cu e bienestar di nan Centro y tambe di e muchanan.
E curso aki ta di importancia pa asina asisti e Centronan di cuido y guia di mucha den formula e vision y mision di nan centro. Ademas pa traha un plan di trabou pa asina optimalisa e calidad di cuido y guia cu nan ta ofrece na muchanan.
Den e curso aki a enfoca riba kico ta Maneho Pedagogico, Calidad, Vision & Mision, Regla y palabracion, Actitud profesional, Etica di trabou y estilo di maneha, Estilo di Refleha Pop/STARR, Plan di trabou pedagogico y pa clausura un examen.
Nuebe cabesante a finalisa e curso exitosamente. FPNM ta felicita e cabesantenan y ta desea nan tur exito den hiba un Maneho Pedagogico efectivo pa asina pronto por mira su frutanan den nan centro.
