Nos ta 100 dia leu pa eleccion pa Presidente di Merca

Riba dia 3 di november 2020 Mericanonan lo dicidi si ta keda cu e Presidente actual of ta eligi un nobo. Donald John Trump di 74 aña di edad a gana e ultimo eleccion pa presidente na aña 2017 contra di Hillary Clinton. 

Trump ta un comerciante hopi exitoso den e ultimo decada, su fam ta aparece riba: Hotel, Casino, Cancha di Golf, Avion, Helicopter y mucho mas. E sede principal di Trump Organisation ta situa na New York, esta Trump Tower, un edificio consisti di oficina, tienda y apartamentonan sumamente luhoso. 

Prome cu Trump a huramenta como e di cuarenticinco Presidente di Merca, e tabata biba na New York den Trump Towers hunto cu su casa Meliana Trump y su yiu mas chikito Barron Trump. Trump ta tata di seis yiu y prome cu a casa cu Meliana, kende ta e Prome Dama di Merca, e tabata dos biaha casa caba, ambos relacion a fracasa. Desde aña 2005 e ta casa cu Meliana. 

E ta sucesor di Barack Hussein Obama, kende a sinta dos termino di cuater aña como Presidente di Merca. Joseph “Joe” Robinette Biden tabata Vice Presidente di Merca for di 2009 te cu 2017, hunto cu Omaba, e tabata e di cuarentishete Vice Presidente di Merca.

Por cierto e ta e contrincante principal di Donald Trump den e eleccion binidero na november 2020, cual ta e di cincuentinuebe eleccion pa Presidente. Biden ta representa e partido Democratico y Trump esun Republicano. Joe Biden ta casa cu Jill Biden y ta tata di cuater yiu. Un politico cu hopi experencia compara cu Trump y a studia den e ramo di ley. 

Trump, a ataca prensa na varios ocasion, den un forma masha mahos. E palabra FAKE NEWS ta un legado di Trump, e palabra a bira masha popular y hopi uza rond mundo. Por corda den su campaña na 2017, ora cu a priminti cu lo bin cu un muraya entre Mexico y Merca. El a sigura cu e gobierno Mexicano lo paga p’e. Esaki ta un di e puntonan cu Trump no a cumpli cu ne, mescos cu 280 otro puntonan mas. 

Na aña 2016 Ex Prome Minister mr. Mike Eman y Ex Minister Mike de Meza a reuni cu Joe Biden y algun hefe di estado den Caribe na Washington, DC. Biden a elogia Aruba, e tempo ey pa e manera cu tabata hiba maneho y cu plannan di energia duradero. 

Cincuenta estado lo vota sea pa Trump of Biden. Nan lo ta e Presidente mas bieu den historia, Trump di 74 y Biden 77 aña di edad. Trump den ultimo simannan aki ta sinti cu hefenan di estado ta perhudic’e, pasobra a cancela tur “rally” (reunion di contacto) den diferente estado. Compara cu Aruba cu ta bishita cas, pone sticker y hisa bandera, den campaña na Merca ta uni hunto den un sala di congreso y e candidato ta hiba su discurso. 

Tur cos ta mustra cu Biden ta bezig ta score mas, mientras Trump ta keda atras den encuestanan riba internet. Biden ta un persona mas trankilo y amabel compara cu Trump. Por corda con Donald Trump tabata yama hende muhe pa porco y palabranan menos bunita. E Vice Presidente di Trump ta Mike Pense, mientras cu Joe Biden no tin un candidato ainda.

“I do solemnly swear (or affirm) that I will faithfully execute the Office of President of the United States, and will to the best of my ability, preserve, protect, and defend the Constitution of the United States”, e huramento aki, sea Trump of Biden, lo expresa riba dia 20 di januari 2021, ora instala e di 46 Presidente y e di 49 Vice Presidente di Merca.