Un bida sin Dios, ta un bida bashi, pasobra caminda e palabra di Dios no ta, Dios su presencia tampoco ta presente. Henter e bijbel ta avisa nos tocante nos comunicacion cu Dios, y e importancia di Dios den nos bida.
Materialismo y inmoralidad ta aleha hende for di Dios, y tecnologia tambe ta den un lucha pa purba iguala cu Dios, pero esey ta imposibel pasobra Dios ta soberano.
Pa nos comunica cu Dios,nos mester haci oracion, keda den Su presencia, Alaba, Adora Dios,pasobra Dios ta tur cos pa nos. Hende ta influencia door di circunstancia di bida, y hopi biaha nan bista ta kita for di Dios, y nan ta fiha riba problema y asina depresion ta drenta.
Ta para skirbi cu tur esunnan cu a logra cosnan grandi den Señor y cu Señor a uza pa Su Honor y Gloria tabata homber y muhe cu tabata comunica cu Dios.
· Abraham su comunicacion cu Dios a haci cu e bira tata di nacionnan.
· Noe a comunica cu Dios y Dios a instrui Noe pa traha e arca.
· David a comunica cu Dios prome cu e a bringa cu Goliat y e a sali e vencedor.
· Ana a comunica cu Señor pa medio di oracion y Señor a habri su matriz.
· Elias a comunica cu Dios pa medio di oracion y Dios a baha candela for di cielo.
· Rey Ezequias a comunica cu Dios pa medio di oracion y asina Dios a salba su pais.
· Sadrac, Mesac, y Abednego a comunica cu Dios pa medio di oracion y Dios a libra nan for di forno di candela.
· Daniel tabata comunica cu Dios pa medio di oracion y Dios a libr’e for di boca di leon.
· Hesus e Yiu di Dios, tabata comunica cu Dios pa medio oracion y e tabata, cana riba lama, y haci hopi milager.
Tur esakinan ta ehempel cu nos por wak riba dje y comunica cu Dios y haya bon resultado pa nos bida y nos famia.
Ta dificil pa lanta un famia sin Dios, pasobra e enemigo ta jaag tras di matrimonio y famia, y sin Dios su presencia, e famia y e matrimonio por trompica.
Hopi cos cu nos ta mira ta sosode, hopi biaha ta sosode pa motibo, cu hende no ta reconoce y no ta comunica cu Dios, y pa e motibo ey scuridad ta aumenta.
Reconoce Dios ta nifica balora Su presencia,respet y honor na Dios, santidad riba tur cos, y caminda Dios por mira esey ta tuma luga Dios lo manda sabiduria pa nos.
Awendia nos ta den un tempo trabahoso caminda,hende ta busca nan propio interes solamente, desobediencia na mayor ta aumenta tur dia, hende ta stima placa mas cu Dios, y door di esey hende ta fria den oracion y door di esey nan comunicacion cu Dios ta debilita.
Si bo haci un encuesta awendia bao di hubentud, kico ta mas importante, nan telefon of nan bida cu Dios, bo ta bay keda sorpresa, pasobra hopi kier sirbi Dios, pero no kier pone tempo pa Dios, nan mester ta guia den ayuno y oracion pa stabilidad spiritual.
E importancia pa sirbi Dios mester ta hinca den curason di nos hubentud, pasobra si Dios no ta hinca den curason di nos hubentud, e malvado ta sigui aumenta su influencia, y nos tur por mira kico ta pasando awor aki .
Dios ta mas importante cu tur cos , pasobra bida ta Dios, y sin Dios nos no tin bida.
Esun cu tin Cristo Hesus den su bida tin tur cos.
Sinceramente,
Pastoor Marcel Balootje.
