Pueblo di Pos Chikito a sa di tolera e filanan di auto cu tur dia ta bay keur na e ex edificio di DTI situa na Pos Chikito.
Awo cu esaki a muda anto Serlimar ta bin na su luga, no solamente e ta leu di ta beneficioso pa Pos Chikito y vecindario, sino tambe e ta neishi pa malesa y ahigiena. Masha bunita cu kier busca un luga grandi y espacioso pa e trahadonan, pero que hubo di e area cu ta habita, practicamente riba un caminda principal, cu tin un trafico basta pisa tur dia.
Tin di compronde cu e intencion ta pa Serlimar muda y bin na e luga aki pa ta mas central, pa ta mas accesibel, segun cu tin cu compronde for di e minister encarga. E minister ta comenta tambe cu pa loke ta trata aspecto di desperdicio cu tin cu wordo atendi cun’e, ta yega e momento pa drenta den e epoca cu nos ta den dje y ta den proceso di modernisa Serlimar, pa por haci Serlimar un compania al dia den e tempo cu nos ta biba den dje y kier pa nan presencia ta mas visual.
E minister ta critica cu e espacio cu e trahadonan ta aden actualmente ta mucho chikito pa nan. Pero e pregunta ta keda, si ta te awo numa nan a ripara cu nan ta trahando den un espacio chikito. Dicon awo nan a bin reclama cu nan ta trahando manera sardin den bleki. Nan mester a reclama for di un principio caba y e ora por a busca un solucion for di basta tempo caba pa loke ta e ubicacion actual di Serlimar. Pero…. Muisstil.
Ta compronde cu desaroyo ta bon, desaroyo ta sano, pero no mester a acosto di e publico, y como tal, e trahadonan tambe.
Fuentenan cerca di e proceso di mudamento, lo bay haci un tipo di voor sortering, lo haci’e na e edificio aki. Kier bin tambe e proceso di reciclahe. Segun e minister, cu esaki ta visibel tur caminda rond mundo, cu den centro di ciudad nan ta ubica bakinan den diferente color y cada un di nan ta tira nan caha di glas, of carton, of ki tipo di desperdicio pa recicla. E persona cu ta bin den su auto, despues di ora di trabao, of den fin di siman, ta pasa deposita esakinan.
Tur esey ta mustra hopi bon, pero….. Nos tin bisiñanan parti p’abao tambe. E containernan di desperdicio pa reciclahe, con cu bay bin, nan ta keda sushi. No mester lubida cu ta net banda pabao ey mes, tin un restaurant y un rumshop cu tur dia tin hende ta bin cumpra nan cuminda of ta bay dal nan drinks. Ki garantia tin cu e luga ta uno higienico despues cu tur hende a bay nan cas? Y e sushi pa recicla, e truck di Serlimar mester pasa eynan, recoge nan y despues sigui su ruta pa dump? Mientras tanto cu pueblo tin cu warda dos aña prome cu nan tin pensa di bay Barcadera, sperando cu no ta un 10 jarige plan, nan lo tin cu keda wanta e bentamento di sushi “pa recicla”, e recogemento diario y tambe, con stabil e bakinan aki ta, cu cachonan no ta bin coba den nan y basha sushi abao. Con cu bay bin, henter e aventura di e mudamento, aunke cu ya hopi a papia di e costonan envolvi, pa loke ta e comunidad, ta keda dudoso.
