Mi ta notando un campaña intensivo contra e empleadonan publico y contra gobierno y ta haciendo como sifuera cu ta nan a inventa, pidi pa e Coronavirus cu ni paisnan poderoso cu ta controla mundo mes no por combati esaki sin tuma e medidanan necesario y drastico pa mira con nos tur por sobrevivi e periodo di 3 luna aki, pero cu despues di esey e problema di likides pa gobierno, comercio, e empleadonan y pueblo en general lo cuminsa mustra su efectonan dramatico. Lo no tin suficiente placa ni den caha ni den cartera!
Ningun hende no por planea cu seguridad, pasobra mucho experto bruha y ningun di nan cu certeza por bisa nos cuanto tempo e bendita virus aki lo por cuminsa laga nos. Ki dia e cos aki lo por caba? Tin ya a cuminsa spanta nos creando panico cu e lo por dura 2 aña y tin expertonan grandi cu a bisa cu nunca mas lo por tin actividadnan deportivo, concierto, sacrificionan di Misa, aglomeracion etc., manera prome cu e entrada di Coronavirus. E hendenan cu mester yuda nos sali afo a laga nos tur nos futuro casi solamente den man di Dios. E inseguridad con lo por sali afo sin e virus tin nos ta biba di man pa boca y ken sa con largo!
No tin espacio pa instigacion
Mi a dicidi di yuda pa concientisa pueblo con dramatico e problema aki ta y no tin espacio pa instigacion, stigmatisacion y agitacion, pasobra tanto gobierno, comercio y e empleadonan en general mester cuminsa biba cu e realidad cu locual nan tabatin ayera, awe e ta hopi menos y hasta tin cu a keda completamente sin entrada, manera esnan den turismo, den comercio general cu no por paga e trahadornan mas, pasobra nan no tin ningun, pero ningun entrada!
E efecto dramatico ta cu sin placa ningun di nos – fuera di nos salud – lo no por biba. E momento a yega pa gobierno, Banco Central y comercio en general trata na cuantifica e sla financiero den placa. Cuanto entrada no ta drenta y e poco cu ainda tin con por traha cune cu prioridad y na un forma efectivo. Hopi tristo mes! Mi a goberna hopi aña, pero nunca mi a mira Aruba y casi henter mundo asina. E desesperacion hasta ta creando excesonan peligroso y p’esey mi ta suplica pa no hunga cu candela, pasobra “ora cu e spirito sali for di den e botter” lo no tin hende pa par’e mas, pasobra practicamente nos tur ta den e mesun boto. Ami ta calcula cu nos lo perde si e crisis aki dura mas cu 3 luna mas cu 70% di nos entradanan ya cu gobierno lo no por colecta loonbelasting, room tax, casino rechten, time sharing. Y lo no tin mucho ni na Inkomstenbelasting corda Winstbelasting, BBO, primanan pa nos pensioen, seguro medico etc. y e entradanan di empresanan di gobierno cu ta e backbone di gobierno den tempo dificil tambe lo cay drasticamente.
Turismo y sector priva
Pero bo tin e hotelnan y tambe tur e negoshinan cu ta depende di turismo, hendenan den transporte, watersport, restaurantnan, tiendanan di souvenir etc. cu lo no por wanta mas cu 3 luna cera sin ningun entrada plus tur esunnan cu ta haci negoshi cu e failidadnan turistico. Mi ta calcula cu 3/4 parti di henter nos forsa laboral lo ta casi sin entrada. Gobierno cu ta esun cu ta guia e pais mes, di tur su entradanan, tin mas cu 80 cen di cada florin ta bay pa paga debe y interes so! Bo ta kere cu lo tin placa cu solamente e 20% cu lo a resta y esey ta si e entradanan keda drenta locual bo sa cu no ta asina! Kico mester haci cu un Hulanda cu kier haci nos limosnero? Nos tin cu bay fia placa, pero con nos ta bay paga bek y cu kico? E situacion aki ta exigi di nos tur cu nos lo wordo poni na prueba kico nos lo por absorba pa conhuntamente sali afo. E lo no ta facil pa ningun hende, pasobra bo ta bringando un enemigo invisibel cu te awe no tin vacuna pa caba cune y bo no sa cuanto tempo e lo por dura.
No puntra pa reserva
Si mi ta notando kico tin hende ainda ta exigi, pidi, ta cumpra gastando placa mi ta puntra mi mes si nos ta consciente cu pa sali for di e pandemia aki practicamente nos ta para nos so. Nan ta consciente con grandi e problema financiero a bira? Abo cu si tin un entrada ainda mester por sa cu pa bo tambe por keda biba trankil bo mester ta dispuesto pa coopera cu esunnan cu ya practicamente a perde tur nan entrada! No bin culpa ni gobierno ni e empleado publico. No ta nan a trece e pandemia Coronavirus pa caba cu nos. No puntra pa reserva (buffer) cerca gobierno si bo tabata sa cu na 2017 e gobierno actual a hereda cu di cada florin cu drenta 93 cen ta bay pa paga debe so! No culpa ni comercio, pasobra no ta nan ni nan empleadonan a causa e pandemia aki.
Sentido comun di responsabilidad
No ta keda nos nada otro pa na un manera responsabel poco poco y unda cu por jump start nos economia cual lo tuma mas cu 1 aña minimo pa ta 20-30% di unda e tabata ta. Lo dura hopi luna cu no ta aña pa por recupera den turismo. Ken lo ta dispuesto ainda pa biaha y tin placa y trabao? Bo no mester a bay ni scol di piso pa bo sa cu tin un tempo hopi dificil ta warda nos tur, pero di kere den nos propio capacidadnan, tin e boluntad y duna otro e espacio necesario y cu fe den Dios nos lo por sali afo. Mundo lo no caba cu nos si nos tur pone nos nanishi den e mesun direccion pa busca un salida menos doloroso pa nos cada un cu un solidarismo y un sentido comun di responsabilidad di un pa cu e otro.
Esaki ta un contribucion segun mi pensamento cu asina mi ta mira e situacion awor aki. Ohala cu lo mi no tin rason.
