E ciudadano Carlos Adrian Rodriguez, handyman di profesion, a acerca 24ora.com pa trece su inkietud den luz publico cu e speransa cu e por yega na oido di esunnan cu por haci un diferencia, no solamente p’e, pero pa tur hende.
Hopi tempo pasa, e tabata un homber cu a uza hopi tipo di droga. E ta prome pa bisa cu danki Dios e ta limpi awo. Dokter de Cuba a dune un receta pa su situacion cronico cu ta dos pildo tur anochi pa drumi. Esey ta funciona pa hopi aña caba y e tin su bida ta funciona.
Ora cu dokter de Cuba a retira, a bay pa otro dokter. Ora el a wak riba su rapport a bisa mesun cos, cu dia e purba kita e pildo di drumi, e ta bay haya problema cu no por drumi, haya depresion, mal beis y no funciona como homber mas. E ora ey el a keda beb’e y ta beb’e pa hopi aña.
Despues el a bay dokter Every na San Nicolas door cu el a haya malesa, cay, bira flaco y su sanger a baha. E ta gradici cu dokter a yud’e cu tur esey, pero na mesun momento a stop e pildo aunke a splic’e pakico e no por stop cu e pildo ey. E no por drumi sin dje anochi. Normalmente e tin cu paga p’e. A manda puntra e dokter, despues di a purba wanta tres siman, e no a logra. E ta drumi djis un dos pa tres ora maximo.
“Mi bida ta disfuncional completamente. Mi ta bira nervio, haya depresion, tur sorto di cos cu no ta corecto. Awo e ta bisa mi cu e pildo ta adictivo, cu mi mester bay landa y cana pa relaha. Hende cu tino bon por landa y cana pa relaha. Si ami tin e problema di drumi, cu dokter a constata. Mi ta traha hopi duro y haci deporte, pero no por drumi. Mi tin tres siman cu lo a drumi un 27 ora total,” Rodriguez a splica.
A puntra e dokter si por haya su pildo bek. Dokter a bisa cu no y cu si no por haci esey, e por busca otro dokter. “Paga mi ta pagando pa mi remedinan. Poco dia ey e mester a kita un siman di cuminda di scol fo’i mi yiunan, un homber cu ta gana 1.126 florin pa quincena. Mi lo mester duna 250 florin na mama di mi yiu, pero mi sa cu esey no ta nada, p’eseyy mi ta dun’e 400 florin pa quincena,” e ta splica. Riba dje e mama di su yiu a bira malo y mester a saca cen for di e cuminda di e muchanan.
“Gobierno mester wak esey, cu nos di menos recurso mester tuma un decision corecto cu nos. Gobierno mester e wak esunnan cu tin mas recurso; eseynan gobierno tin cu cobra, no anos cu tin menos recurso. Cuanto belasting cu ta bin di turismo cu por yuda nos di menos recurso pa remedi; remedi cu pueblo tin cu sufri p’e. No t’ami so. Bo sa cuanto hende grandi mi ta wak den botica ta yora ora sali pasobra no tin mas placa, djis pa paga remedi so. Ami ta biba den nan. Mi ta biba den tur e tristeza cu pueblo tin. Nos cu a buta boso riba e luga aki, nos cu a buta boso na e puesto ey. Asina boso ta duna nos un trato? Asina nos ta merece? Mi chihuahua cu ta mara na cas mes tin miho trato cu nos.
Mi ta puntra mi mes: Si ningun hende ta touch den e caha, placa ta yega pa pueblo completo. Wak El Salvador, wak e gobierno di El Salvador, con e ta yuda su pueblo, con e ta bringa pa e pueblo. Pero aki mi ta wak con gobierno ta mata pueblo y su cartera y su salud y su bida. P’esey nos no tin bida mas. AZV a kibra nos. Ta compronde cu cos ta fastioso, pero asina tampoco por bay cu uns alario di dos mil florin pa luna. Pa ora mi haci compras pa mi yiu mes, ta Sali mi un cantidad di placa, mi tin cu paga cas, paga’ki, mi mes a keda sin nada. Tin ora ta frifia mi tin cu frifia pa mi por haya poco gasolin. E bida no t’ey. Ora bo tin placa di pueblo y bo mishi den placa, nunca placa ta yega y despues ken ta wanta e sla? Anos. AZV ta un ehempel. Tur cos a bay laira. Esey no ta nada bunita.”
Rodriguez ta kere cu gobierno mester tuma ehempel di Nayib Bukele, cu esey ta un homber, un president cu tin hopi respet y hopi honor cu e ta apoya. “Boso mester stop cu e cosnan aki. Wak con boso pueblo ta bay, awo boso a core habri caminda den caya principal. Boso ta kere esey ta yuda nos? E ta yuda nos pa trece un pan pa nos yiunan? AZV ta kibra nos cartera cada rato.
Mi tin mi ex suegra ta yora, hende rond, ami ta den hende grandi y bo sa con nan ta yora. Asina bo ta stima bo pueblo. Asina bo kier bo pueblo Evelyn Wever-Croes? Si ningun hende mishi cu placa di pueblo, placa ta yega tur caminda aki na Aruba pa esunnan di menos recurso. Esey so mi kier a bisa.
Awo e dokter ey tambe mi mester mi pildo di drumi, mi Dormicon di 15mg cu mi ta bebe añanan caba. E kier men ta adicto mi ta bira di dje, pero esey ta pone mi bida funciona. Awo con mi ta bay haci? Boso ta cobra mi, awo dokter tampoco kier duna mi e receta cu mi tin cu paga pa nan. Imposibel gobierno. Si ta asina bo ta cana bay, no lubida cu ta pueblo a buta bo, pueblo lo kita bo.
