Dios ta stima mundo asina tanto cu e a duna na tur hende, mes un oportunidad, y esey ta e plan di salbacion den Cristo Hesus, bisando cu esun cu kere lo tin bida eterno, ma esun cu no kere lo ta condena.
Esaki ta locual Dios ta pidi di nos y ta para skirbi den e buki di Mikeas; 6:8 E a bisa bo loke ta bon,y kico Señor ta exigi di bo: Si no ta pa haci husticia, pa stima misericordia,y pa cana humildemente cu bo Dios.
Awor den Romanonan 12:2 e palabra di Dios ta siña nos lo siguiente: No sea conforme e mundo aki,ma sea transforma, pa medio di e renobamento di boso mente, pa boso por comproba, kico ta e bon y agradabel y perfecto boluntad di Dios.
Y ta bon pa nos sa kico ta e tres cosnan cu ta separa hende for di Dios y nan ta para skirbi den 1 Juan 2:15-16.
Bisando: No stima mundo ni cosnan cu tin den mundo. Si un hende ta stima mundo,e amor di e Tata no ta den dje. Pasobra tur loke tin den mundo, e deseo di carni,y e deseo di wowo,y e orguyo di bida,no ta bini di e Tata , sino di e mundo.
Ta para skirbi den Marco 8:36 bon cla pa tur hende comprende: Pasobra ki probecho un hende tin si e gana henter mundo y perde su alma.
Mundo ta yen di influencer hende nan cu ta sembra pa nan mes, tur locual ta temporal, tur locual nan por desvia hende cu ne for di e caminda di Dios, y hopi ta cay den e trampa diabolico aki, pasobra unabes e enemigo logra influencia un persona y kita su bista for di riba Dios, e ta logra tumba e persona den scuridad y inmoralidad.
Esun cu ta di curason perverso,ta un abominacion pa Señor, ma esnan perfecto den nan caminda ta Su delicia (Proverbionan 11:20).
Tur caminda bo ta tende hende ta bisa pa no husga, y e palabra di Dios tambe ta bisa asina, y hopi cu ta cana den scuridad, impuresa y perversidad, ta uza e versiculo aki pa defende nan mes contra nan inmoralidad.
Pero no lubida, cu e palabra di Dios ta bisa cu na un hende su fruta lo bo conoce, y awor nos tin di comprende cu ta dificil pa bo haya sumpiña den un palo di mango, pero e mal influencia di mundo ta pone hende mira cosnan cu no ta, y balora cosnan cu ta temporal mas cu locual ta eterno.
Pasobra awor bon ta wordo yama malo, y malo ta wordo yama bon (Isaias 5:20).
Esun cu cana den rectitud lo cana confia, ma esun cu perverti su camindanan, lo wordo descubri (Proverbionan 10:9).
Den Genesis 39;10-12 Hose a demostra con un homber por ta capas di mantene su integridad.
Y den Genesis 41:41-43 nos por mira cu integridad ta bini di Dios, y e gloria ta pa Dios y Hose a keda bendiciona.
Den Daniel 6:4 nan a busca manera pa acusa Daniel, pero nan no por haya ningun motibo pa acus’e di corupcion, pasobra su integridad a prevalece, y den Daniel 6:26-28 nos por lesa y sa con Dios ta bendiciona un persona integro y na Dios tur e Gloria.
Palabra di Dios ta bisa den Job 36:7: E no ta kita su bista for di e husto, ma e ta pone nan sinta, pa semper cerca reynan, riba trono,y nan ta wordo halsa.
No tin forsa humano cu por contra Poder di Dios.
Sinceramente,
Pastoor Marcel Balootje.
