Dialuna pa mas of menos 1:45 am a sosde un accidente pisa dilanti di Great Rich Bar and Restaurant na Paradera. “Ta un lift mi a bay duna un hende y mira den kico m’a haya mi aki”, asina chauffeur di e van marca Mitsubishi a duna di conoce. E mes a sali ileso pero su vehiculo a sufri daño na e parti patras.
E accidente tabata entre un van marca Mitsubishi modelo L-300 color blanco, numera A-77778 y un auto marca Ford modelo Figo color cora, numera A-28065. E Ford tabata core tras di e Mitsubishi y pa un of otro motibo no a mira cu e van a brake pa e bay e bar. E Ford a pega su tras.
Pues, ambos vehiculo tabata bin di e rotonde di Paradera, pues esun a dal tras di e otro. Chauffeur di e Ford Figo, e conocido Andrew Ras, a resulta herida. Cu ambulance a transport’e pa hospital pa ricibi tratamento medico avansa. Polis y Forensys ta encarga cu e investigacion. Lo mester saca afo kico exactamente a sosode. E daño material ta considerabel.
