Ta parce cu tur aña carnaval semper ta conoce su retonan y si no tin, nos mes ta busca un! Awor ta resulta cu e banda Buleria, cu aña pasa tabatin Rey di Tumba, Rocco Franken, e aña aki no ta participa mas. Por lo menos esey nan a informa den un comunicado di prensa, argumentando cu a retira nan inscripcion. Pero bandanan a sigura cu nan a inscribi lat y cu henter e inscripcion tabata ilegal!
Parce cu diaranson den Centro di Bario Brasil a tuma luga inscripcion pa Festival di Tumba y alabes festival di Caiso y Soca 2020. Eynan 4 banda a inscribi, Delicious, Zeta Band, Stimami y Grupo di amigonan. Na tur tin 10 Tumbero cu a inscribi. Pues, Buleria no a inscribi! Su mañan, e organisadonan, encabesa pa Darren van Ommeren, a invita e bandanan pa un reunion urgente den cual a renegocia e premionan y condicionnan, pa cual a pidi pa baha premio pa e festival por continua. A acorda cu ta tira awa den biña.
E dia ey a puntra si por inscribi Buleria ainda, di cual unanimamente e bandanan a contesta cu NO, pasobra e fecha di inscripcion a pasa. E organisado a puntra si un di nan por tuma Sashah Figueroa pasobra e no a haya un banda pa participa cune, pa cual Delicious a bay di acuerdo pa compañ’e.
Pa sorpresa di e bandanan, segun Jerrino Ridderstap a splica, nan a bin tende na radio cu Buleria lo participa den e festival. E bandanan ta considera esaki un acto robes y ilegal. Tambe ta sinti cu tin conflicto di interes pasobra e mesun Darren van Ommeren ta den Empire, e grupo di carnaval di Buleria y como tal ta tuma un decision asina aki, contra palabracion haci cu tur banda.
A informa e comision organisado cu si ta kibra regla, e ora nan no ta di acuerdo mas cu e premionan y kier renegocia premionan atrobe. A bisa cu esey no por, pero si kier pa Buleria participa, pa cual e 4 bandanan a para duro riba un NO. Asina awe Buleria a dicidi di hala atras y Darren van Ommeren lo a menciona di lo tuma su retiro como Presidente di e Comision Organisado di e festival.
Asina por mira claramente cu e kita e festival for di Robert Jeand’or, pero awo…prome cu e festival mes, e mesun organisado y bandanan ta haya nan mes den un “clash” cu un final masha mahos y un peliger pa continuacion di e festival! Esaki ta duna un muestra hopi cla di e amateurismo cu cual ta organisa nos carnaval.
