Museo Historico un biaha mas ta forma parti di e evento mas grandi di boluntario aki na Aruba, esta Aruba Doet. Mirando cu e mision di Museo Historico ta pa conserva y preserva nos historia, meta e aña aki ta pa trece bek e estado autentico di e cura pafo di Fort Zoutman.
Cu ayudo di boluntarionan di e grupo di Divi Impact di Divi Resorts y tambe di Guardian Group, lo traha rond di e murayanan mas bieu na Aruba cu e aña aki ta cumpli 220 aña di existencia.
Prome cu drenta e museo, ja caba kier cuminsa conta e storia di Aruba na e parti pafo di e Fort door di planta diferente mata cu tabatin un impacto historico riba nos isla. Por ehempel, lo planta un mata di brasil cu a hunga un rol importante den siglo 17 y alabes duna atencion na e hecho cu awendia tin un escasez di esaki. Tambe lo planta matanan di Aloe ja cu esakinan tin un conexion directo cu Fort Zoutman. Na aña 1889 Gezaghebber Jacob Thielen a planta 200 mata di aloe paden di e murayanan di e Fort. Otro mata importante tabata e tuna cu a wordo planta pa cultiva e insecto cochiniya y cu a hasi su entrada na Aruba na aña 1837.
Ademas, na e antesala di exposicion ‘Hofi’ lo planta diferente mata medicinal pa por comparti e historia di curioso.
Museo Historico Aruba lo sigui sembra simia no solamente pa e futuro generacionnan pero tambe pa para keto na e importancia di e historia cu a forma nos.
