No ta desconoci pa Aruba cu pa nos Prome Minister sra. Evelyn Wever-Croes muchanan tin un prioridad grandi y un luga hopi special den su curason. Pa e motibo aki tambe riba dia di su cumpleaño, e mandatario di nos pais a celebra esaki den compania di muchanan.
Tabata un honor pa Prome Minister ricibi muchanan di Emma School na Fort Zoutman diamars mainta na unda hunto cu Sinterklaas y su Zwarte Pietnan nan a goza di un mainta hopi bunita anima. Cada muchan a ricibi un regalito di Sinterklaas.
Sr Lyonell Dirkzs a anima e celebracion aki en bibo den su programa di Mainta Diferente na TOPFm na unda esnan na cas tambe por a disfruta di cumpleaño di nos Prome Minister.
Juffrouw Jenny Boekhoudt, den nomber di cabesante y demas docentenan y alumnonan di Emma School, a haci entrega di un regalo na Prome Minister, kende a aprecia esaki masha hopi mes.
Pa Prome Minister sra. Evelyn Wever-Croes tabata un gran placer pa mira caranan contento di tur e muchanan di Emma School. Y a encurasha nan tur pa nan sigui haci nan best na scol. Y alabes desea nan tur feliz dianan di fiesta benidero.
Na e ocacion aki Prome Minister a tuma tempo pa gradici tur esnan cu a haci su cumpleaño asina special cuminsando pa Party Express cu a regala e muchanan Dino Jump y tur su servicio riba e dia aki. Na su colega Minister Chris Romero cu a percura pa un Arubus busca y hiba e muchanan di Emma School pa Fort Zoutman. Y finalmente Prome Minister ta gradici Emma School pa bin celebra hunto cu n’e y haci e dia aki asina inolvidabel p’e.
Pabien Prome Minister.
