Diahuebs anochi tabata un dia historico pa e deporte di baseball na Aruba ora Amateur Baseball Bond Aruba a inaugura e prome edicion di e ABBA Baseball Week den e ballroom di Hollyday Inn dilanti di dignitario y invitadonan di honor. Presidente di ABBA, sr. Sherwin Howell a hiba palabra unda e la bisa cu e projecto aki a hiba mas cu un anja di planificacion y preparacion intenso pa asina ofrece un siman di curso di nivel mundial y cu personanan capacita for di exterior. E inauguracion di e ABBA Baseball Week a wordo inaugura pa e mandatario di deporte, sr. Dangui Oduber den presencia di Su Excelencia Gobernador, sr. Alfonso Boekhoudt y Presidente di Parlamento, sr. Ady Thijsen. Mester bisa cu for di exterior bini algun persona masha conoci den mundo di baseball na Merca principalmente den Mayor League Baseball. Durante e fin di siman a duna clinica na e umpire, coaches y na nos muchanan como tambe charla na nos coach y umpire nan. Esakinan a tuma lugar na tereno di Nadi Croes/Crismo Angela na Sta Cruz y den e sala di Piedra Plat Entertainment Center.
E anochi aki ABBA a duna reconocimento na e aporte di St. Fundacion Lotto Pa Deporte. Sr. Di-Stefano Wernet, director di Lotto, a ricibi un award. Tambe Sr. Tito de Cuba, presidente di e hunta di supervision di St. Fundacion Sportsubsidie Aruba, a haya un award pa nan sosten na de deporte baseball.
E federacion di ABBA por mira tras di un evento sumamente exitoso cu sigur lotrece su beneficio nan pa tanto nos pelotero, coach y umpirenan. No tin duda cu seminarionan aki lo yuda e desaroyo di nos baseball unda nos por dal un stap grandi pa e proximo nivel, un nivel mas halto.
Pa e proximo anja, ABBA por spera sigur e apoyo di St. Fundacion Lotto pa Deporte cu ta sostene projectonan cu ta na bienestar di tur cu ta traha pa e deporte engeneral, aki por pensa riba atletanan, dirigentenan, coachnan, umpirenan, ect, ect. Lotto cambiando bida di nos deporte na Aruba.
