Diahuebs, mayoria di e scolnan rond di Aruba, a cuminsa cu aña escolar 2018-2019, cu hopi animo y cu algun actividad prepara pa e muchanan di parti di e docentenan.
Colegio Laura Wernet-Paskel no a keda atras. Cabesante di e scol, Bernadeta Figaroa-Kelly a comenta, cu ya dos siman prome cu scol habri, e maestronan ta cuminsa prepara.
Cada docente di e scol a scoge nan tema. E cabesante a expresa di ta hopi contento mes con nan a haci’e. Cu hopi amor, cu hopi creatividad, cu hopi idea. Y ta haya e resultado hopi bunita. Tin docente a coy appel como nan tema. Tin a usa Red Carpet como tema, tur mucha ta un strea riba su mes den un Hall of Fame. Tin a scoge bij, tin a scoge curason. Tabata tin un variedad di creatividad.
Cabesante interino y alabes docente di 2de klas, Joanne Croes-Werleman, di su banda a comenta cu ta importante pa cuminsa cu un bon pia. E prome impresion ta hopi importante pa tanto e alumnonan como nan mayor. Esey ta duna e confiansa cu ora bo yega bo ta bon bini den bo klas. E prome dia pa e aña aki tabata uno diferente, debi cu e cabesante y algun miembro di e team, a para na entrada di e scol y a cuminda cada mucha, cada mayor cu a drenta.
Bo ta forma e momento ey caba un band cu cada alumno y cada mayor, manera un famia grandi di e scol. Eynan caba ta kibra e ijs na entrata di e scol. Portanan habri, decoracion, hopi mensahe bunita di cada maestro, cabesante para eynan, tur hende ta welkom e muchanan. Nan ta perde ey e sinti di miedo of ta sinti laaf. Bo ta sinti cu bo ta bin bek un caminda cu bo ta safe, bo ta contento y ta siña hopi y pasa bon.
Ta haciendo esaki un tradicion cu cada tanto luna ta haci un opening oficial caminda cu full scol ta bin hunto y ta aplica tur loke a siña den conscience discipline. Aki ta aplica diferente cos cu a siña den tayer y charlanan riba e tema aki. E ta bay pa bo crea un siguridad. Un luga caminda e muchanan por bin, ta contento, ta safe, manera un famia. Mescos cu tin famia na cas, na scol tambe ta manera un famia.
