Algun fanatico cu wowo di aguila lo a capta y keda deslumbra durante wega 5 di World Series diadomingo pasa. Durante e di 7 inning, na momento cu e pitcher Gerrit Cole di Houston Astros tabata prepara pa haci su lansamento, dos modelo/ influencers riba rednan social sinta patras di home plate a hisa nan blusa y “Flash” e pitcher como tambe e miyones di televidente na cas.
Ambos dama, Julia Rose y Lauren Summer ta traha pa un revista parecido na PlayBoy bou nomber di Shagmag, cu e Co-Fundador Stephen McHugh ta yama e “Millennial version di Playboy”. Di su banda ta aclaria cu Julia, por cierto tambe Co-Fundador y CEO di e revista a pusha e “Stunt” aki pa asina crea mas conscientisacion riba e tema di cancer di pecho.
Esaki no a interesa e miembronan di siguridad pa nada, y a pasa na saca e modelonan for di e stadion inmediatamente, mucho menos a cay na agrado di Major League Baseball cu a saca un carta di prohibicion pa bida largo na e dos modelonan. Riba rednan social por a tuma nota di e carta cu MLB a manda, e modelo Rose a publica e carta cu ta bisa lo siguiente: “Durante e wega, bo persona a viola e codigo di conducta stipula pa fanatico door di expone bo mes durante e di 7 inning di wega cu proposito pa promove bo negoshi. Bo persona tambe tabata parti di un complot pa instiga otronan pa expone nan mes hunto cu bo pa promove un negoshi. Cu esey bo persona ta keda prohibi di cualkier stadion y/o facilidad di Major League Baseball pa bida!”
Hunto cu e modelonan Rose y Lauren tabata tin un persona mas, Keyla Lauren cu tambe a flash e pitcher pero no a keda capta den e camara na momento cu el a haci esey. Tambe ta bisa cu e stunt lo por a afecta e wega di diadomingo mirando cu na momento cu hungado Ryan Zimmerman tabata na turno pa batia e pitcher Cole a otorga su segundo base por bola di e anochi te na e momento ey. Otro nan ta bisa cu e lo tabata di bon suerte pa Astros como cu nan a gana e wega 7-1 y a hibanan awo na cabes di e serie na 3-2 liderando esaki.
