“Awe mi a mira dos desaroyo preocupante na Aruba. Dos banda di nos hendenan cu no ta bunita”, asina Minister Presidente mr. Evelyn Wever-Croes a duna di conoce diahuebs anochi riba su pagina di Facebook. “E prome ta e odio cu ta wordo expresa contra un grupo di persona cu ta bin di otro pais. No ta nos custumber pa expresa nos asina. Ban mustra convivencia cu esnan cu ta pasando den momentonan dificil na Venezuela y ban resa pa nan”, di acuerdo cu e prome mandatario di nos pais.
“E otro ta e dolor di mira con algun hende ta hunga cu sentimento di otro, door di gaña nan cu awor nan por haya amnistia. Corda cu e grupo di hende aki cu a bin di Venezuela ya caba ta pasando momentonan dificil y no ta husto pa hunga cu nan sentimentonan”, asina Wever-Croes a expresa.
Di su parti e ta haci lo posibel pa yuda, dentro di e posibilidadnan cu tin, cu lamentablemente no ta hopi. Tin retonan grandi pa enfrenta. “Ta solamente uni nos lo vence. Dios spaar nos di hendenan cu ta hunga cu sentimento di otro di e forma aki”, asina Prome Minister Wever a termina bisando.
