No tabatin discusion, nan no a pleita, no mester a yama Polis, no tabatin publico ni pa coalicion ni pa oposicion, e reunion a dura algun minuut….asina Parlamento di Aruba a aproba 3 presupuesto awe. Esun di Raad van Advies, Algemene Rekenkamer y finalmente esun di dje mes. No tabatin necesidad ni pa motiva e votonan, sino den forma unanime, MEP, AVP, POR y RED a uni pa aproba nan presupuesto, cu a conoce un aumento di 15%.
E presupuesto pa aña 2018 pa Raad van Advies ta di no menos cu Afl. 2.213.600,=. Ta considera Raad van Advies como e consehero di mas halto y e ultimo tambe pa Gobierno y Parlamento, relaciona cu asuntonan di maneho y di ley. Den nos sistema ta considera Raad van Advies hunto cu Parlamento y Algemene Rekenkamer como “Hoge Colleges van Staat”. A nota un aumento den e presupuesto compara cu aña pasa, specialmente na e post di “deskundig advies”.
Presupuesto Raad van Advies – 2018
Den caso di Algemene Rekenkamer, ey e presupuesto a baha compara cu aña pasa. A presupuesta e suma di Afl. 2.441.800,= pa aña 2018.
Presupuesto Algemene Rekenkamer – 2018
Pa loke ta e presupuesto di Parlamento di Aruba pa aña 2018, ta nota un aumento di 15%, pues di Afl. 12.558.800,= pa Afl. 14.490.800,= den presupuesto di e aña aki. Notabel ta cu den salario y beneficio pa e Parlamentarionan y personal di Parlamento, a aumenta di Afl. 4.884.000,= pa e suma di Afl. 6.519.000,= den e aña aki. Hasta e “vakantie-uitkering” pa miembronan di Parlamento a aumenta den e presupuesto di 2018. E post di “voorlichting en promotie” a casi redobla, di 125 mil florin na 2016 y 2017, awor pa 2018 a subi te na 225 mil florin. E post di “deskundig advies” a subi di 500 mil florin aña pasa pa 626 mil florin e aña aki. E post di biahamento si a keda mesun cos cu aña 2016 y 2017, esta di 595 mil florin.[/caption]
Presupuesto di Parlamento di Aruba – 2018
