Awe merdia pa mas of menos 2:00 pm a sosode un accidente serio den Caya Ernesto Petronia, entre un auto particular y un Taxi. Chauffeur di e auto marca Chevrolet modelo Equinox color cora, numera A-20014, a bisa polis na e sitio cu e ta un empleado di Ministerio Publico di Aruba. El a hasta cuestiona dicon polis ta laga prensa saca su potret, siendo cu na Hulanda, polis ta proteha identidad di miembronan di Ministerio Publico. Di otro banda, Ministerio Publico a subraya cu e homber aki NO ta traha cu nan!
Pero, su comportacion tabata dudoso. Dado momento el a cuminsa zundra, altera y papia palabra vulgar via celular pero den bos halto. Polis mester a hala su atencion na mas di un ocasion, splicand’e cu si e altera, e auto lo no drecha y e slanan ricibi den e accidente lo no bay for di su curpa. A pidie pa trankilisa su mes y warda riba ambulance. E homber a conta polis cu ta su ruman a yam’e puntr’e con ta cu e auto, en bes di puntr’e con bay cu su salud despues di e accidente.
Contal cu ora ambulance a yega, a nota masha lihe cu e homber mas bien ta armando un ‘show’. Parce cu e no tabatin sla manera el a bisa, sino mas bien e tabata betra. Polis a dicidi di bin cu e mashin pa test y ora a lag’e supla, a resulta cu “bingo”…meneer tabata basta burachi tras di stuur. Esey ta splica tambe con el a baha caminda asina sin mas bay dal frontal den un Taxi.
E homber parce di ta Ramsey Hernandez, cu tin apenas algun luna bek na Aruba for di Hulanda. Aki el a bisa tur hende cu e ta traha na Ministerio Publico y cu na Hulanda e tabata un hefe grandi na Deloite. Pero e realidad ta cu e tin problema serio cu adiccion y awe el a kibra un auto relativamente nobo durante e accidente.
Vocero di Ministerio Publico a confirma awe tardi cu nan no conoce e homber aki y nan tin ningun trahado cu e nomber ey, ni cu a core stage of ta famia directo di un trahado. Es mas, trahadonan di Ministerio Publico no ta gosa di inmunidad pa por stuur auto y causa accidente burachi. Ningun hende ta para riba ley, pues si bo causa accidente burachi, husticia lo persigui bo!
