Ministerio Publico a apela sentencia den caso di 110 kilo di cocaina

52

Corte di Prome Instancia a declara Angelexcinio Croes; Ruthley Zievinger; Kendrick Wernet y Giovanni Rafini, liber pa importacion y posesion di 110 kilo di cocaina na april ultimo. Nan tabata contento cu e decision pero Ministerio Publico no y como tal a apela e decision. Esaki ta nifica cu lo trata e caso di nobo, pero e biaha’ki door di tres Hues di Corsou. E fecha exacto no ta conoci ainda.

Dia 17 di april ultimo Ministerio Publico a keda den shock ora Corte a informa cu nan a conclui cu e pruebanan presenta no ta convincente pa condena e cuatro acusadonan aki.

A acusa nan cu riba dia 19 di mei 2018 nan lo a importa 110 kilo di cocaina cu un balor di mey miyon dollar, cu a descubri na cas di e homber Angelexcinio Croes na Casibari.
Tabatin hopi buraco den e investigacion, hopi aspecto of punto cu no a sigui traha riba nan y riba cualnan Hues a haci pregunta pero no por a haya contesta. E tempo ey Hues a bisa: “E ta bay pa e pruebanan cu no ta suficientemente onderbouw”.

Asina por ehempel a cuestiona cu a confisca e piñero den cual a transporta e droga te tres dia despues di e “inval”. No a uza e cacho di Polis pa hole si den e boto tabatin droga; e icejugnan cu potret a saca cu tabata den e boto no ta mescos cu esnan mira na e cas, segun e grabacion di camara. A haya na e cas tres Icejug: un blanco grandi un blanco mediano y un blauw. Esnan cu a mira den e diferente filmacionnan cu a confisca ta mustra dos icejug grandi. Na e cas esnan haya ta uza caba y no ta e dos nobonan cu el a cumpra dos dia prome.

Tres Hues diferente ta bay analisa e caso di nobo pa mira si nan ta duna Fiscal razon of tambe ta yega na e mesun conclusion cu Corte di Prome Instancia.

E castigo cu Fiscal a pidi den Prome Instancia tabata: Pa Croes, Rafini y Zievinger 7 aña di castigo y pa Wernet a pidi 5 aña di castigo.