Den stadhuis di Amsterdam a tuma lugar diahuebs merdia 24 di augustus un recepcion pa e studiantenan di Curaçao, Boneiro, St. Maarten, St. Eustatius y Aruba. Den e sala di reunion di e municipio di Amsterdam loco burgemeester Kaisa Ollongren a yama tur e studiantenan bon bini.
E recepcion a conta cu presencia di Minister Plenipotenciario Juan David Yrausquin kende a wordo ricibi pa loco burgemeester Kaisa Ollongren na su yegada na stadhuis di Amsterdam. Tambe presente tabata functionario di departamento di Enseñansa di Gabinete di Aruba Ivonne Navas y e mentornan pa Amsterdam Edy Ranada y Lourdes Bramble-Tromp.
Den su discurso na e studiantenan sra. Ollongren a menciona e hecho cu e studiantenan a tuma un paso grandi di sali for di nan isla pa bin biba y studia na Amsterdam. E politico a bisa e grupo di studiante cu nan mester trata na haci Amsterdam nan segundo hogar. ‘Pesey e merdia aki ta hopi importante pa boso por sinti boso welkom na Amsterdam. Boso a tuma un paso grandi den boso bida. Un lugar unda bo no conoce ningun hende y bo no conoce bo caminda. Pero boso lo siña conoce Amsterdam hopi liher. Asina cu boso cuminsa cu boso estudio esaki ta tuma hopi tempo di bo mes, cu kisas lo tin espacio pa heimwee.’
‘Desde añanan 50 hobennan di Antia y Aruba a bin Hulanda pa sigi un estudio avansa. Hopi a bai bek y esunnan cu a keda a enrikece Amsterdam y otro ciudadnan na Hulanda cu nan cultura. Desde e momento cu boso ta akinan boso ta un “Amsterdammer”. Ta hende ta haci loke Amsterdam ta,’ asina sra. Ollongren a bisa.
Ademas e loco burgemeester a encurasha e studiantenan pa haci mas uso posibel di e facilidadnan di e Hogeschool of Universidadnan y tambe di e diferente “studentenverenigingen” na Amsterdam,’ asina loco burgemeester Kaisa Ollongren a bisa e studiantenan.
Despues a sigi un introduccion di diferente instancianan cu ta di importancia pa e studiantenan, manera Hogeschool di Amsterdam, Universiteit van Amsterdam, Vrije Universiteit, Meldpunt Discriminatie y Dienst Uitvoering Onderwijs (DUO).
Minister Plenipotenciario Juan David Yrausquin a cuminsa na felicita y gradici Amsterdam pa ta organisa e evento aki pa nos studiantenan. ‘E hecho cu e loco burgemeester di Amsterdam ta yama boso welkom ta algo sublime. Nos meta ta pa mas hopi di nos studiantenan caba nan estudio cu exito y cu un gran parti regresa Aruba. Nos tarea ta pa duna mas sosten ainda na nos studiantenan pa nan logra nan meta,’ asina e mandatario a bisa.
E programa a continua na unda Tanya Fraai a entrevista diferente studiante tocante nan estudio, e razon pa a scohe pa bin studia na Amsterdam y otro topiconan interesante. E young profesional Edion Wallé a tena un discurso den cual ela conta a base di su mesun experencia con e bida di studiante na Hulanda ta; ela duna tipnan valioso na e studiantenan. Na final e studiantenan a participa na un quiz pa mira con bon nan conocimento di Amsterdam ta.
Despues di e programa Minister Plenipotenciario Juan David Yrausquin a probecha di e ocacion pa a papia cu e grupo di studiantenan di Aruba.
Esaki ta di sheta aña cu municipio di Amsterdam ta organisa e recepcion aki pa e grupo nobo di studiantenan di e parti Caribense di Reino Hulandes.
