Diamars anochi un carta a sali for di Ministerio di Asuntonan di Adulto Mayor dirigi na Magaly Brito, secretaria general di sindicato SEPPA cu ta representa un mayoria di trahadonan di SABA.
Den e carta Minister Arends ta informa cu manera a trec’e dilanti den reunion cu SEPPA y den presencia di mediador di Gobierno, lo haci tur cos na alcance pa proteha e trahadonan nan derecho. Tambe pa garantisa e atencion di cuido pa e clientenan di SABA. SEPPA su preocupacion tabata si trahadonan di SABA lo ricibi nan vakantieuitkering. Un preocupacion similar na esun di comienso di aña ariba bashi-premie unda Minister Arends mester a pone fondo adicional disponibel pa esaki por a tuma luga. A saca e fondonan aki for di e presupuesto destina pa asuntonan di adulto mayor y cu SABA a ricibi su parti como compensacion pa ehecuta Gobierno su maneho na bienestar di nos grandinan.
Bashi-premie y vakantieuitkering ta loke SABA y instancianan, subsidia door di gobierno mester pone un banda for di e subsidio total cu nan ta ricibi durante di aña, pa ora e momento yega, e fondonan aki ta disponibel pa paga e trahadonan. Esaki ta loke SABA no a haci pa su trahadonan.
Minister Arends ta di opinion cu no mester perhudica e trahadonan di SABA den e impasse aki. Minister ta confirma cu SEPPA cu ta duna instruccion pa e tranferencia di AWG 1,021,434 na SABA. Cu e cantidad aki, SABA ta bolbe ricibi fondonan adicional pa e trahadonan ricibi nan vakantieuitkering cu nan tin derecho riba dje.
Minister Arends ta informa tambe cu esaki ta bin cu consecuencianan, mirando cu na final di dia ta di fondonan publico ta papiando di dje y mester tene consideracion cu e presupuesto y duna cuenta di e maneho di esaki. Lo deduci e cantidad cu SABA a ricibi pa cubri cu debernan di bashi-premie y vakantieuitkering for di presupuesto cu Land Aruba tin presupuesta pa nan subsidio.
Por ultimo, Minister Arends ta comparti e preocupacion pa e trahado- y clientenan di SABA. Ta spera cu por alivianan di e precupacion di vakantieuitkering y cu pronto por yega na un situacion entre Gobierno di Aruba y SABA.
