Recientemente Minister di Husticia y Asuntonan Social Rocco Tjon a reuni cu Minister di Salud Publico, Desaroyo Social y Labor Omar Ottley, kende a bishita e facilidad di SPD pa haya un splicacion di e departamento mes, di con ta atende cu diferente reto riba e tereno di salud mental como tambe e parti di adiccion.
Segun minister Tjon, den un cierto sentido e ta algo bon pa scucha cu practicamente tur pais ta confronta e mesun retonan, y loke ta haci esaki algo bon ta, cu e ta crea un oportunidad pa nos por colabora mas cu otro, pa asina hunto nos surpasa e retonan aki. Mayoria pais ta confronta cu e mesun retonan riba tereno legislativo, pero tambe riba e parti di financiamento ora ta trata e tematica di salud mental y adiccion, y tambe e parti di educacion. Esakinan ta e topiconan cu a discuti pero tambe a duna un splicacion di con Aruba ta atende cu e retonan aki, y di parti di Sint Maarten tambe a haya un splicacion amplio.
E mandatario a expresa cu algo hopi positivo ta cu ya caba tin diferente protocol y MOU cu firma den reino, caminda e departamentonan en cuestion ta traha hunto. Banda di esaki, a haci palabracion concreto pa asina e dos ministerionan aki bay colabora mas di cerca cu otro ora ta trata e parti di asuntonan social, pero tambe e parti di salud mental y adiccion.
Por ultimo, minister Tjon a expresa cu e ta wak bek riba un reunion hopi fructifero, caminda a palabra tambe cu pronto lo bay acerca colega Minister di Desaroyo Social di Corsou, Ruthmilda Larmonie-Cecilia, kende recientemente tabata na Aruba tambe, pa asina crea un colaboracion entre e tres ministerionan den reino encarga cu e parti di Asunto y Desaroyo Social.
