Dialuna mainta a habri e siman cu algun accion di paro di trabao y manifestacion, un di esakinan entre otro na Scol Di Polis netamente un dia prome cu inscripcion pa tuma polis nobo.
Representante di SPA a indica cu e urgencia ta grandi pa cu atencion na e situacion aki, y tin cu sikiera busca un edificio temporario pa move e klasnan pa asina evita cu e studiantenan bira malo, tanten cu bini solucion na largo plaso. Minister Rocco Tjon ta bisa cu e mester sa tur e detayenan un rato prome cu duna un contesta detaya, pero e prome caminda yama pa Polis acudi cu nan preocupacion ta na alto mando di Cuerpo Policial.
“Ami semper ta habri pa traha cu tur hende. Tur diabierna keto bay di 8:00am pa 9:00am, mi agenda ta habri pa sindicato di Polis. Mi mester bisa si cu pa basta luna nan no a haci uzo di e oportunidad aki,” segun Minister Tjon. E mandatario a splica cu Cuerpo Policial ta e organisacion cu gobierno ta duna mas hopi atencion, den colaboracion cu sindicato di Polis tambe.
E mandatario a menciona riba diferente renobacion di warda, proyecto multimiyonario di camara, operacion command center, renobacion di warda di polis na Savaneta, proyecto di portophone unda tur agente lo haya uno pa prome biaha, y asina algun cos mas manera auto cu tecnologia nobo.
“Nos porta ta habri pa sindicato di Polis, ful Cuerpo Policial. Nos a haci e rondanan tambe di bishita y aumenta e presupuesto di Cuerpo Policial cu algun miyones, si compara esaki cu gabinetenan di otro asignatura, ta papia di un aumento di 6 pa 7 miyon florin.”
