“Na momento cu bo ta fia placa como pais bo sa di antemano cu lo tin condicionnan mara na bo peticion. Esakinan ta varia entre condicionnan suave y condicionnan mas pisa y estricto. Nos ta consciente cu esey ta e caso PERO Hulanda NO por kere cu den pleno crisis nan kier pone nos dicidi den 4 dia riba cambionan den nos structura estatal”, asina Minister di Turismo, Salud Publico y Deporte, Dangui Oduber, a bisa un rato pasa riba su pagina di Facebook.
“Bo no por abusa di Bo poder den pleno crisis di Covid-19! Esaki NO ta e momento pa mal uza e situacion cu nos a haya nos aden”, asina e mandatario a sigui bisa. Minister Oduber ta referi na e decision di Conseho di Minister di Reino cu a manda un documento di 218 pagina pa Gobierno di Aruba cu 18 condicion cu ta mara pa por sigui fia Aruba placa den e crisis aki. Si Aruba no contesta pa e siman aki, anto diabierna awo den Conseho di Minister di Reino na Den Haag lo no aproba e siguiente fiansa.
