Lejuez na Wever: Show me what you got

7122

“Awe por a tuma nota den noticia local cu Gobierno di Aruba lo a ricibi un documento di 218 pagina di Hulanda cu ta contene entre otro 18 condicion cu Aruba lo mester cumpli y bay di acuerdo cu ne pa por ricibi sosten financiero di Reino. Den cuadro di transparencia y bon gobernacion, a pidi Gobierno pa comparti e documento aki cu Parlamento y tambe ki fecha lo por spera un reunion cu Gobierno, mirando cu e proximo Rijksministerraad ta planea pa diabierna dia 10 di juli y unda ta planea pa trata esaki”, asina Daphne Lejuez, Parlamentario independiente den Parlamento a bisa awe.

E miembro di Parlamento ta basa su mes riba transparencia y pa Parlamento por funciona debidamente y controla Gobierno, e ta haya necesario pa por mira e documentonan tambe. Gobierno a bisa awe cu e documento tey pero cu nan mes lo kier studi’e prome. Riba dje Gobierno di Aruba ta desea pa Gobierno di Hulanda manda un documento mas cortico cu e por comparti cu pueblo, den cual ta indica claramente kico tur Gobierno di Aruba mester haci pa por cumpli cu e demanda di Hulanda pa por haya e fiansa, pa cuminsa na luna di juli caba. Si no cumpli, anto ni subsidio di salario, ni FASE y probablemente ni salario di empleadonan publico.

Cu e realidad ey den mente, awor aki Hulanda ta poniendo condicionnan, cu segun Gobierno, ta mucho pisa y na masha mal momento. Gobierno ta insisti cu den pleno pandemia y crisis economico, no por abusa di e poder financiero di Hulanda pa pone Aruba lomba contra muraya. Ta sinti cu Hulanda porfin a haya e islanan den e posicion cu nan lo tabata desea di hopi aña pasa caba, pa por impone un forma nobo di traha y miho maneho di finansa publico.