Diamars mainta parlamento a cuminsa atende presupuesto supletorio na tempo, unda tin e cambionan di presupuesto.
Minister di Finansas y Cultura, mr. Xiomara Maduro, a indica cu el a saca un lista pa parlamentario Wyatt-Ras, pasobra e tabata papia cos y e no tabata sustancia nan. Riba e lista por a mira cu e cambionan di presupuesto tabata yega parlamento 5 di december. Ora esey yega, ainda mester bay Comision Central, mester bin tanto pregunta como debate.
Segun e mandatario, esey a pone cu hopi bes nan ta den parlamento riba día 30 di december, sali bay mira pagara y regresa parlamento pa sigui atende e presupuesto.
El a corda cu e tempo ey no tabatin cuenta cu parlamento ta bay den reces. E mandatario a bay c’un lista pa mustra e parlamentario cu e presupuesto tabata laat, pero awo e cambio a pasa pa 2022. Mas importante cu e presupuesto 2023 ta uno historico cu ta conta cu surplus.
Pero tambe e ta un presupuesto cu despues di diescinco aña entrega y trata na ora. E mandatario ta spera cu awe ta vota p’e. Esey kiermen prome cu december tur hende tin claridad cu ora aña bolter kico por spera di dje.
