Scol Reina Beatrix ta na YMCA Dakota, pero awo ta haciendo e preparacionnan pa pone cuater klas na e edificio di Paso pa Futuro. Tin mirada pa futuro cu e edificio aki bira completamente p’e scol di Reina Beatrix keda acomoda.
Minister di Enseñansa, Ciencia y Desaroyo Sostenibel, dr. Armando R. Lampe, a splica cu e edificio aki ta hopi grandi y ta e unico edificio disponibel. Asina ey por pone bek hunto e scol di Reina Beatrix, ya cu awo e ta dividi na diferente localidad. Na e edificio aki tin diferente klas bashi y nan a acomoda, a haci e preparacionnan.
No ta logico pa ora ta responsabel cu placa di pueblo ta bay huur un edificio pa algun local, mientras tin local bashi. Ta inaceptabel pa uza como argumento cu no kier mescla cu e muchanan special. E mandatario ta di pensamento cu esey ta discriminacion, esey no ta aceptabel den e tempo moderno.
E scol futuro di Aruba, cual no ta presente ainda aki pero si na otro pais, Lampe a ricibi bishita di un juffrouw Arubiano cu tin 30 aña trahando na Merca. Nan a papia con e lesnan ta y e juffrouw a splica cu e ta para dilanti un klas, unda cu tin mucha cu nivel di HAVO, VWO, EPB, MLK y esey ta yama diferencia. Diferencia ta un tema cu e maestronan ta siña na IPA.
Lampe, kende tabata docente un tempo na IPA mas di binti aña pasa, a indica cu ta diferencia den un grupo. E juffrouw a bisa cu e ta sumamente contento cu e trabou cu e ta haci na Merca. Pa hopi aña ta haci esey na Merca y aki ainda no. Ta impensabel pa tin un scol primario pa MLK, un scol primario pa mucha den enseñansa regular. Na Merca nan ta den un grupo y ta diferencia segun e ritmo, capacidad di cada mucha.
E idea di un enseñansa inclusivo, ta un idea clave den enseñansa unda no ta discrimina, el a indica. Ta kere cu pocopoco tin di bay den e direccion ey.
Pa cobertura mas amplio, lesa e edicion di TREMPAN mañan.
