Despues di e Aruba Investment Summit na Hulanda, e siguiente dia mainta trempan, Minister di Asuntonan Economico, mr. Geoffrey Wever a bishita Wageningen University & Research. E mandatario recientemente ta hopi bezig cu diferente cos relaciona na diversificacion di Aruba su economia. Como parti di maneho di gobierno, pa diversifica Aruba su economia, tin diferente pilar anto un di nan ta agricultura comercial. Tin e deseo pa desaroya agricultura comercial como pilar economico, ja tin diferente empresario exitoso den esaki.
Dos siman pasa a lansa Agrifund anto gobierno ta haciendo diferente esfuerso pa tin un industria di agricultura. “Pero nos mester asistencia mas tecnico, p’e motibo ey por ehempel nos a yega na PRIVA cual ta un compania specialisa den tecnologia di agricultura pa wak con por yuda nos.” A bishita tambe un compania yama Royal Peppers cu ta interesa pa establece un produccion di paprika na Aruba.
Biniendo bek n’e bishita na Wageningen, a tene diferente reunion unda a conta nan riba Aruba su ambicion y necesidad pa yega na siguridad di cuminda. “Despues di Covid nos sa cu esey a bira algo hopi importante y nos ta kere tambe cu e por representa algo interesante pa nos economia, creando cuponan di trabao nobo, haciendo nos menos independiente di importacion,” segun minister Wever.
Turismo ta e ‘main driver’ di nos economia pero na mes momento segun minister Wever nan kier desaroya pilarnan economico nobo. Agricultura comercial ta algo cual e ta kere cu semper Aruba tabata desea pa tin. Aworaki a dicidi pa realmente enfoca riba dje y percura pa esaki bira un realidad.
P’e motibo ey a bishita e universidad aki pa wak con nan por yuda concretamente. “E reunion a bay hopi bon. Nos ta pensando por ehempel pa cuminsa cu un Agri innovation park, caminda tin diferente empresario hunto riba un tereno y ta yuda nan pa por haci nan negoshi.” Ta algo cu a cay hopi bon n’e universidad y kisas algo cu nan por yuda Aruba cu ne rib’e parti tecnico, con pa diseña esaki y tur loke e ta encera cu ful un analisis.
Manera cu yega Aruba lo sigui e trabaonan aki pasobra gobierno ta haya esaki hopi importante y necesario segun e mandatario pa continua na stimula desaroyo di agricultura comercial como pilar economico.
