E conferencia di Clacip a yega su fin y Minister di Husticia, Arthur Dowers, a keda hopi satisfecho cu esaki. E ta orguyoso cu a organisa pa prome biaha den historia di Clacip, e reunion na pais Aruba, pero prome biaha cu el a bin Caribe. Clacip ta e organisacion di inteligencia policial di Latino Americano y Caribe y ta pa prome biaha cu el a bin Caribe y Aruba tabata tin e honor di por haci’e. Esey ta demostra e forma, e nivel di departamentonan cu a crea ultimo añanan. E ta demostra tambe e nivel di cooperacion cu nos tin den e pais y e confiansa cu ta reina den e pais. E minister ta sumamente orguyoso cu por tabata na e clausura pa por a felicita e presidente nobo di Clacip, deseando tur tipo di forsa y exito den e trabao pero tambe expresa di parti di Gobierno di Aruba, confirma e importancia di e relacion cu tin cu tur e servicionan di inteligencia den nos region y tambe gradici nan pa e cooperacion cu a bin ta ricibi. Conhuntamente cu e departamentonan aki, ta logra mantene siguridad den nos pais pero tambe contribui na e siguridad den nos region.
Tin diferente reto grandi den nos region na e momento aki y varios pais den e region ta sinti’e. E hecho cu nan ta hunto cu Gobierno, a duna e oportunidad pa intercambia kico e retonan aki ta encera y con tambe por, conhuntamente frena y brinda mas siguridad pa nos mesun hendenan, pa esnan cu ta bishita nos. E importancia di esaki ta cu nos pais, como un pais turistico, tin cu garantisa, no solamente siguridad di nos hendenan, pero di esnan cu ta bishita nos, nos como pais ta conciente di e importancia aki. Ora cu sr. Nicolas a acerca e minister pa haya e peticion pa bin cu e reunion aki, mesora a bisa si. Cu ta sostene 100%. Minister di Asuntonan General tambe, pasobra nan dos ta responsabel pa siguridad nacional. Aunke un parti grandi ta inteligencia policial, toch ta sinti cu e importancia di e servicio aki ta birando cada biaha mas visibel den nos comunidad, pero tambe den nos region. Tin momento cu servicionan ta nenga di comparti informacion cu otro. Conoce ehempelnan clasico den nos historia, caminda cu tabata tin consecuencianan devastador pa cierto paisnan, pa e hecho cu no a logra di comparti informacion cu tabata tey, informacion ta presente. Ta un servicio y no ta comparti’e cu otro servicio. Ta un di e retonan grandi pa tin den futuro. Pa percura cu e departamentonan ta traha hunto, formula metanan comun pa loke ta e importancia pa garantia di e siguridad di e pais y bin cu plan di trabao tambe pa implimenta esaki. Ta logrando na pais Aruba. Mag di ta orguyoso den esaki y ta sigur cu esaki lo refleha positivo tambe pa pais Aruba den e region y hasta mundial.
