Minister di Turismo y Salud Publico, Dangui Oduber, tabata di bishita na Embassy Suites by Hilton. E bishita aki a tuma luga como parti di un proyecto cu a inicia e aña aki, caminda cu ta bishita diferente hotel pa haya mas informacion tocante nan vision.
Durante e bishita, Oduber a haya oportunidad pa topa cu e Gerente General di Embassy Suites, Pablo Casal. Embassy Suites ainda ta bou di construccion y su inauguracion oficial lo ta na januari di 2023. Durante e recorido a indica cu Embassy Suites ta e di dos brand cu mas aña di existencia di Hilton.
Durante e encuentro aki un presentacion a duna un presentacion di tur loke e hotel aki lo tin di ofrece na su huespednan. E hotel ta consisti di 330 camber, di cual tur camber ta suites. Lo tin 134 king suites, 196 double queen suites y tambe lo tin 2 grand suite. Tur e cambernan aki lo tin bunita bista, cu opcion pa lama y tambe opcion di mira ariba Bubali Plas.
Durante e bishita tambe nan a splica cu tur camber cu bende lo inclui desayuno. Nan lo tin un restaurant den e lobby cu ta yama “Brickstone” y tambe bandi pool lo tin un otro grill restaurant cu ta yama “Splash”. Tambe nan a splica cu nan lo ofrece un recepcion di dos ora tur anochi, cu bebida inclui pa tur nan huespednan. Esaki ta parti di nan strategia tambe pa diferencia nan mes for di otro hotelnan na Aruba y tambe un oportunidad pa socialisa.
Den e segundo fase di e hotel nan lo tin un spa y tambe un casino. Tambe nan a mustra e tunnel cu ta conecta e hotel cu Eagle Beach. E hotel a focus tambe pa traha un ballroom hopi espacioso y diferente meeting rooms cu por uza pa ora di evento den grupo of pa diferente ocasion.
E mandatario a gracidi Embassy Suites by Hilton pa e bishita aki y tambe pa e presentacion di nan futuro calidad y servicio. Minister Oduber ta hopi entusiasma pa e plannan pa futuro. Ta un inversion di $130 miyon cu lo bay crea entre 150-200 cupo di trabou cual ta hopi importante pa Aruba. Durante nos recorido nos a tuma nota cu ya caba tin varios profesional Arubiano den servicio di e hotel.
Tur e desaroyonan aki ta coherente cu e vision di Ministerio di Turismo pa sostenibilidad y tambe pa duna mas balor na e turista cu ta inverti den Aruba y tambe pa hisa e calidad di nan experiencia ora cu nan ta di bishita.
