Marko Espinoza, di 24ora.com a combersa diabierna cu Sidney Kock, Secretario di Sociedad Hulandes Arubiano den antesala di e evento cu ta ofrece diasabra anochi pa marca e 25 aniversario di e organisacion. Ademas di varios orador, Kock a indica cu tras e anuncio di e presencia di Prinses Beatrix na e evento, e interes pa entrada a crece y a bende tur entrada disponibel.
E programa ta hopi varia y ta inclui par di orador hopi clave. Viola Heutger, rector di Universidad di Aruba; Gert Oostindie, un persona masha conoci den comunidad pa loke ta asunto di Reino y antropologo Francio Guadeloupe.
E secretario di e sociedad a splica ademas cu a scoge oradornan pensando pa no para keto so riba e desaroyo actual, pero cu tambe tin un enfoke riba loke nos por spera den futuro. Viola Heutger ta bay papia riba importancia di enseñansa. Guadeloupe ta bay mas riba e parti di kico cambio climatico ta bay trece pa nos. Oostindie ta keda enfoca riba e relacion den reino y kico por spera den futuro.
Kock: “Aniversario a haya acogida cu ta haya bishita di Prinses Beatrix pa convivi e echo. Esey ta crea unificacion cu su presencia y ta representa su amor pa Aruba y tambe relacion entre Hulanda y Aruba. Esey ta base cu semper nos a boga p’e pa 25 ana caba pa nos ta un brug entre Aruba y Hulanda y traha riba bienestar di e relacion entre Aruba y Hulanda. Mas comprension aki na Hulanda pa loke ta e desaroyo y posicion di Aruba y loke e ta nifica den Reino.” Kock a bisa cu esey semper tabata nan trabou y ta para keto riba esey, pero na mesun momento pensando tambe kico ta haci pa futuro.
Presente lo ta miembronan di e sociedad y par di hende pafo di e miembresia. Por ehempel lo t’ey e embahador di Surnam y e Nationale Ombudsman, entre otro. Lamentablemente Prome Minister Rutte a disculpa cu e no por atende mas y esey ta conta tambe pa e Secretario di Estado, Alexandra van Huffelen.
Asina mes e evento ta sold out pasobra tin e sociedad tin un presupuesto pa un cantidad determina di persona. Na momento cu a anuncia cu Reina Beatrix lo ta presente, e interes a crece hopi mas. Kock ta kere cu esey ta door cu: “Como reina e tabata hopi envolvi cu e isla, semper el a mustra hopi cariño pa Aruba.”
