Den kuadro di orientashon riba posibilidatnan pa nos studiantenan bai studia den region ku kondishonan faborabel, Minister di Enseñansa, Siensia, Kultura i Deporte, sra. drs. Marilyn Alcalá-Wallé a sinta huntu ku representantenan di University of Louisiana Monroe.
Meta di e bishita di kortesia aki tabata pa sera konosí, interkambiá ku otro i wak kiko ta benefisionan pa studiantenan di Kòrsou studia na University of Louisiana Monroe.
Gobièrnu di Kòrsou su empeño ta pa krea mas oportunidat di estudio di kalidat haltu pa nos studiantenan por desaroyá nan mes komo suidadadonan ehemplar nashonal i mundial.
University of Louisana Monroe ta ofresé 88 estudio di Majors i Minors den kategoria di Arts, Education & Sciences, Business & Social Sciences, Health & Pharmaceutical Sciences.
Ta bon pa indiká ku e universidat aki ta akreditá i ta konsistí di 9220 studiante, di 50 pais, di kual 20 studiante ta di Kòrsou, Boneiru i Aruba.
Universidat di Louisiana Monroe, ta konosí komo e “Sportsman’s Paradise” ya komo ku e siudat di Monroe ta ofresé diferente oportunidat pa hasi deporte i rekreashon den airu liber. Tambe e universidat ta disponé di un ‘campus’ kaminda studiantenan por biba i traha. Alabes University of Louisana Monroe tin laso ku diferente skol na Oropa, inkluso Hulanda. Esaki ta brinda e fasilidat na studiantenan pa sigui studia na Oropa, inkluso Hulanda, si nan ta deseá esaki.
Minister di Enseñansa, Siensia, Kultura i Deporte, sra. drs. Marilyn Alcalá-Wallé a keda kordialmente invitá pa bai hasi un bishitá na e universidat pa asina e mes por mira kiko nan ta ofresé den realidat.
Gobièrnu di Kòrsou ta sigui krea oportunidat pa nos studiantenan por bai studia di un forma mas ekonómiko i benefisioso den region.
