A bisa cu ta hopi importante pa keda monitorea e situacion di nos capacidad na hospital.Esaki a cambia awe.Den un rueda di prensa di diaranson anochi, minister di salud publico, deporte y turismo, Dangui Oduber a anuncia cu tin 4 persona interna. Sin embargo un di nan no a wordo interna pa Covid en principio. Na momento cu a intern’e, a test’e y a bin resulta cu e ta positivo. E otro tresnan si a interna nan pa Covid y un di nan ta den ICU. Dos ta den e afdeling normal.
Cantidadnan ta keda halto
E cantidad di casonan ta keda halto y e ta keda preocupante. Pero tabata spera esaki si for di siman pasa dialuna, na momento cu a identifica e sitio di contagio, cu tabata for di clubnan nocturno.Ta spera di lo mira un gran cantidad di caso pa e siguiente dos simannan, cuminsando for di siman pasa dialuna, ta loke ta experenciando.
Ta nota si cu e cantidad di testnan cu ta haci pa dia, ta bahando y tambe e cantidad di casonan positivo tambe ta bahando compara cu siman pasa.Siman pasa tabata test un averahe di mil caso pa dia. Ya caba e ultimo dos dianan esaki a baha drasticamente. Ta bezig ta test 500 caso pa dia.
Esaki ainda ta halto y ainda no a keda satisfecho, segun e mandatario. Pero ta keda cu e conviccion cu lo por maneha e curva aki, cu lo “flatten the curve.” A spera y a anticipa e cantidad di casonan positivo cu ta experenciando na e momentonan aki.Ta monitorea e situacion tur dia. A bisa desde un principio ora cu a cuminsa experencia e subida di e casonan demasiado halto.
Bao di control
E situacion te na e momentonan aki ta totalmente bao di control. Pero mirando e casonan cu tin, por spera cu lo tin mas persona cu por interna den hospital. Ta importante tambe pa menciona cu di e cantidad di casonan cu a resulta di ta casonan positivo.14% di e casonan ta a-sintomatico; 61% di e casonan cu a test positivo ta sintomatico.
Es decir cu nan a demostra un of otro di e sintomanan y 25% ta bou analisis na e momentonan aki pa determina si nan tabata a-sintomatico of sintomatico.Tambe ta importante pa comparti e informacion di e categoria di edadnan di esnan cu ta infecta. Ta personanan relativamente hoben.
E categoria di edad di 15 pa 24 aña tin 36% cu a resulta positivo. E categoria di edad di 25 pa 34 aña ta 30% y di 35 pa 44 aña ta 16%. E edad averahe te cu awe ta 31 aña. Ta personanan relativamente hoben y relativamente den bon estado di salud cu un sistema imunologico hopi bon, pero naturalmente ta keda e preocupacion kende e personanan aki por a sigui contagia.Ta pesey ta importante pa tur esnan cu ta positivo, pa isola nan mes.
Manera ta conoci, dialuna ya caba a anuncia varios cambio den DVG. E virus ta keda desaroya diariamente. Mester evalua e maneho. Mester evalua strategia. Tin cu ahusta esaki pa mehora e situacion cu ta manehando. Ta pesey a anuncia cu ta adapta e maneho di test. Ta adapta tambe e maneho di cuarentena y isolacion.
Manera cu a anuncia dialuna, e a adapta e maneho di test y ta urgi solamente esnan cu tin sintoma pa bay haci test pa tuma contacto cu nan dokter di cas of yama 2800101.Personanan cu no ta sinti ningun sintoma, no tin mester pa nan bay test.
